Ilisimatusarfimmi - ujarlerpoq

Ilinniartitsinermik Ilisimatusarfik

Ilinniarfissuaq Ilinniartsitsinermik Ilisimatusarfiup ataaniippoq.

Ilinniartitsinermik Ilisimatusarfimmi pisortaavoq Britta Lohmann.

 

Ilinniarfissuaq januaarip aallaqqaataani 2008-mi instituttinngorpoq Kalaallit Nunaanni Ilisimatusarfiup ataanut inissineqarami. Instituttimut aamma ilaavoq Inerisaavik, naliliinermik, inerisaanermik meeqqallu atuarfiini sullissinermik suliaqarluni immikkoortortaasoq, maanna avissaartinneqarluni ilinniartitaanermut naalakkersuisoqarfimmi immikkut aqutsisoqarfiusoq. 

Ilinniarfissuup pingaarnertut suliassaraa meeqqat atuarfianni ilinniartsisussanik, bachelorisut qaffasitsigisumik ilinniarsimasunik, ilinniartitsineq. Ilinniarneq assigiinngitsutigut ingerlanneqarsinnaavoq, ilinniarfissuarmi tamakkiisumik ilinniarluni imalt. ilinniartitsisutut suliutigaluni illoqarfigisami ilinniarluni.

Diplomitut, masteritut kiisalu kandidatitut ilinniaqqinnerit kiisalu pikorissaanerit sivikinnerusut Ilinniarfissuup aamma isumagisarai.

Ilinniartitsinermik Ilisimatusarfik tasanilu sulisut arlalitsigut attavigisinnaavatit soorlu aamma Ilinniartitsinermik Ilisimatusarfimmi ilisimatuut misissugaat assigiinngitsut atuarsinnaagitit.

 

Ilinniarfissuup oqaluttuarisaanera naatsumik:

Kalaallit Nunaanni ilinniartitsisussanik ilinniarfik Ilinniarfissuarmik ukiorpassuarni taaguuteqarpoq. 1845-imi pilersinneqarami Ajoqersuivissuarmik taaguuteqarpoq, ajoqissat tassani ilinniartinneqartarmata.

Ilinniarfissuaq Kalaallit Nunaanni ilinniarfiit pisoqaanersaraat 1845-mi pilersinneqarluni, massakkullu biskoppip illugisaani ajoqinngorniarfiulluni. Ilinniarfissuup masakkut illutaa Nuummut ukiorpassuarni ilisarnaataasimavoq, Nuuk kommuniugallarmat komunip ilisarnaataani assiliartaalluni. Illutaa 1907-imi sananeqarpoq atorneqalerlunilu septembarip 18-ianni. Ulloq taanna Ilinniarfissuup nalliuttorsiortarfigaa.

Illorsuaq ilisimasanut qaamaasaqarnermullu ukiorpassuarni ilisarnaataavoq, anersaakkut inuunermut ilisimasanullu Kalaallit Nunaanni qitiulluartuulluni, illut pingaarutillit allat akornanni qitiulluni, Nuutoqqami alianaatsumi inissisimalluni.

Oqaluttuarisaanerup suluppalunnera tamaani malugineqarsinnaavoq, kisiannili taamaakkaluartoq Ilinniarfissuaq nutaaliorfiujuarpoq uummaarilluartuullunilu ullutsinnut naleqquttoq.

Ilinniartitsisunngorniat ilinniartitaanermikkut faginut pædagogikkimullu piginnaasanik ilisimasanillu patajaatsunik piginnaaneqalertarput. Piginaanerit tamakku ataatsimoortinneranni ilinniartitsisoq pinngortinneqartarpoq.

Fagini ataasiakkaani ilinniartitsinermi ilinniartitsissutit ilikkarnartut ilaalluinnartarput, tamatumanilu fagit atuagassartaat ilinniartitsisunngorniallu suliffimmi misiliinermigut misilittagai ilinniartitsinermi ataatsimoortinneqartarlutik.


Attavissat

Assigiinngitsut aqqutigalugit attavigisinnaavatsigut

Atuaruk

Paasisimasalik

Immikkut ilisimasalittavut ajornanngitsumik attavigikkit

Atuaruk