Iluliaq - Kalaallit Nunaanni ilinniartitsinermik ilinniartitaanermillu ilisimatusarfik

Pillugu

Iluliaq tassaavoq ilisimatuutut misissuiffik Ilisimatusarfimmi pilersinneqaqqammersoq, tassanilu Kalaallit Nunaanni ilinniartitsineq ilinniartitaanerlu sammisatut qitiutinneqarput.

Ilisimatuutut misissuiffik Ilinniartitsinermik Ilisimatusarfimmit aqunneqaqqaassaaq, ilisimatusaqatigiillu misilittagaat tunngavigineqassallutik - tamannali ilutigalugu ilisimatusarfiup avataaneersunik, nunatsinneersunik nunanilu tamalaaneersunik ingerlassalinnik suleqateqarnissartik aamma ammaffigaat.

Oqaluttuarisaanermi tunngaviusut

Iluliami sammisatut ilisimatusarfigisanik siammasissunik misissuivigisat aallaqqaaterpiaaniit naammassinissaata tungaannut periuseq atorlugu ilisimatusarnissaq eqqarsaatigineqarnikuuvoq.

Tamanna ima isumaqarpoq, Ilinniartitsinermik Ilisimatusarfiup tunngaviusumik atuarfimmik ilinniartitsisutullu ilinniarnermik ilisimatusarnerup iluanni maannamut nukittuffigisanik ilisimatuutut misissuiffik tunngaveqartoq, tamannali ilutigalugu anguniagassatut takorluukkat ingerlanneqarneri tamakkerlugit isiginnittaaseq allineqassaaq.

Meeqqat inuunerminni siusissukkut ulluunerani paaqqinnittarfinni, atuarfinni inuusuttullu ilinniarfiini ilikkariartulernerannit ilisimatusarfimmi ilinniartinneqarnernut aamma sulilernissamut piginnaanngorsagaanernut kiisalu inuuneq tamakkerlugu ilikkariartornermut tunngasut ukkatarineqassapput.

Atuarfik tunngaviusoq suli pingaarnertut inissisimassaaq, inuilli, inuiaqatigiit kulturillu inuuneq tamakkerlugu ilikkariartornermit ilinniartitaanermillu qanoq sunnerneqartarnerinut Iluliap siammasinnerusumik sammiveqarluni misissussavai.

Siunertaq

Ilisimatuutut misissuiviup aqqa, Iluliap, itissuseq aamma nukittussuseq ersersippai: iluliap ilarujussua immap iluaniippoq, soorluttaaq ilinniartitaanermik ilisimatusarnerup iluani atuarfinni, ilinniarfinni aamma kattuffinni aaqqissugaanerit ersinngitsuusinnaasut ulluinnarnik ilusilersuisuusut paasiniarneqassasut.

Iluliaq kusanartumut nukittuumullu aammattaarli allanngujasumut qajannartumullu assersuutaavoq, tassa pilertartoq ingerlasartorlu - ilisimatuutullu misissuivimmi ilisimatusarfigineqartartunut assingusoq.

Ilinniartitaanermi ataqatigiittut tamarmik suleqatiginissai Iluliap anguniagassatut takorluugaraa - tassa ulluunerani paaqqinnittarfinnit meeqqallu atuarfiinit inuusuttut aamma ingerlaqqiffiusumik ilinniakkanut - kiisalu kattuffinni suliffeqarfinnilu ilinniartitaanernut tunngasuni ilinniartitaanerit.

Kissaatigaarput:

• nunatsinni atugassarititaasut ulluinnarnilu inuunermut qanittunut attavilerlugu ilisimatusarnernik ineriartortitsinissaq

• ilisimatusarnernit uppernarsarneqarnikut tunngavigalugit najugaqarfinni ilinniarfiit piginnaanngorsaqqiinerillu ikorfartornissaat

• atuarfiit, ilinniarfiit, oqartussaqarfiit aamma suliffeqarfiit oqaloqatigisarnerisigut ilisimatusarfigisassanik nutaanik pilersitsineq

• ilinniartitsineq ilinniartitaanerlu pillugit nunanik tamalaanik suleqateqarnerup nukittorsarnissaa

Naatsumik oqaatigalugu: nunarput tamakkerlugu ilinniartitaanermut suliassaqarfimmik tamarmik suleqateqarnissaq.

Suliniutit

Iluliami ilisimatusaatigalugu ineriartortitsinermilu suliniutit siammasissut aallunneqalereerput, ilaatigut tassaasut:

• atuartut nunatsinni atuarnerminni misigisaat

• ilinniartitsisut piujuartitsinermik aamma silap pissusianik atuartitsinerminni suleriutsitigut misilittagaat

• nunatsinnut attuumassutilerlugu silami atuartitsinermik ineriartortitsineq

• nunatsinni meeqqat atuarsinnaanermikkut ineriartornerannik misissuinerit

• atuarfinni, ilinniartitsisunngorniarfimmi aamma ingerlaqqiffiusumik ilinniaqqiffinni digitaliusut aamma atortorinerisigut ilinniartitsinerit

• ineriartortitsinermi suliniutit assigiinngitsut, ilaatigut suleqatigisat nunanit avannarlerneersut peqatiginerisigut ilinniartunik eqeersimaartumik peqataatitsinikkut ilinniartitsineq aamma piujuartitsinermut atuartitseriaatsit ukkatarineri

Ilinniartitsisut, atuartut, ilinniartoqarfiit aamma najugaqarfinni inuiaqatigiit suleqatiginerisigut ilisimasanik atorneqarsinnaasunik ineriartortitserusunnerup suleriaatsinut qanimut atassusilernissaa suliniutini ataatsimut anguniagaavoq.

Suleqatigiinneq

Ilisimatuutut misissuiffiup ilisimatusartut, ilinniartitsisut kattuffiillu ilisimatusarfiup avataaneersut suleqatigiinnissamut qaaqqusassavai.

Suleqatigiinnerit suliniutit, tikeraatut saqqummiiartornikkut, workshoppertitsinikkut imaluunniit piffissami sivisuumi ilisimatusaqatigiinnerni tigussaasuni ingerlanneqarsinnaapput.

Iluliaq ammasumik uummaarissumillu pilersitseqatigiiffittut oqallittarfiunissani kissaatigaa, tamatumani nipit assigiinngitsut Kalaallit Nunaanni ilinniartitsinermik ilinniartitaanermillu ineriartortitsinermut taperseeqataasinnaallutik.

Attavissat

Iluliaq professori Rikke Ørngreenimit, lektorimik Lars Demant-Poortimik suleqateqarnermigut aamma Ilinniartitsinermik Ilisimatusarfimmik instituttillu pisortaanik siunersiueqateqartarnikkut, aqunneqarpoq.

Eqaatsumik aaqqissugaasoqarnissaa anguniagaavoq, tamannalu ilisimatusarfimmi ilisimatusarfiullu avataaneersut ilisimatusartut Iluliami ingerlassani peqataatinneqarnissaannut periarfissiivoq.

Rikkep aamma Larsip anguniagaat siunissamullu takorluugaat uani atuakkit.

Tamatuma saniatigut Louise Pindstrup Scavenius, Kirsten Føns, Ivalo Mathiassen & Line Groth Nielsen ilisimatusaqatigiinnut aamma ilaapput.