Inuiaqatigiilerinermik Aningaasaqarnermik Tusagassiornermillu Ilisimatusarfik pisortartaarpoq

Tusagassiorfinnut nalunaarut: Inuiaqatigiilerinermik Aningaasaqarnermik Tusagassiornermillu Ilisimatusarfik pisortartaarpoq

Lektori aamma ph.d. Annemette Nyborg Lauritsen Inuiaqatigiilerinermik, Aningaasaqarnermik Tusagassiornermillu Ilisimatusarfimmi pisortatut atorfeqalissaaq januaarip 1-ianni 2022.

Inuiaqatigiilerinermik, Aningaasaqarnermik Tusagassiornermillu Ilisimatusarfimmiipput tusagassiortunngorniarfik, isumaginninninnermut siunnersortinngorniarfik, inuiaqatigiilerinermik inatsisilerinermillu ilinniarfiit aamma inuussutissarsiornermi aningaasaqarnermik ilisimatusarfik.

Annemette 2012-imi Ilisimatusarfimmi issittumi kulturikkut, oqaatsitigut inuiaqatigiinnilu pissutsini ph.d.-nngorpoq – taamanimiillu Kalaallit Nunaanni issittumilu inuiaqatigiinni siammasissumik itisiliilluni ilisimatusarnermik suliaqarpoq.

Annemettep soqutigisaraa ilinniakkanik pilersaarusiorneq, suliaqarfiit peqatigiissillugit ilisimatuutut misissuineq ilisimatuutullu misissukkanik ingerlatitseqqiineq paasisat inuiaqatigiinnit kalaallinit atorneqarsinnaaniassammata; tamakkuuppullu Annemettep atorfimmut toqqarneranut pissutaasut pingaarnerpaat.

Qilanaareqaarput Annemettep Inuiaqatigiilerinermik, Aningaasaqarnermik Tusagassiornermillu Ilisimatusarfimmi Ilisimatusarfiullu immikkoortuini sinnerini ilisimatuunik ilinniartitsisunillu suleqateqarnermini ilisimasaminik piginnaasaminillu atuinissaa taamalu Ilisimatusarfimmi inuiaqatigiit pillugit ilisimatuutut misissuinermut isiginnittaatsinik periutsinillu nutaanik tunissuteqarluni – tamanut iluaqutaasussamik.

Paasisaqarnerujumaguit attavigiuk rektori Gitte Adler Reimer uku aqqutigalugit: tlf. +299 38 56 02 imaluunniit gitr@uni.gl.