Nunatsinni Ilisimatusarnermik Siunnersuisoqatigiit aningaasaliissutaat

Ilisimatusarfimmi ilisimatuut ilisimatuullu Ilisimatusarfimmut atassuteqartartut Nunatsinni Ilisimatusarnermik Siunnersuisoqatigiinnit aningaasaliiffigineqarput:

Carsten Juul Jensen, Peqqissutsimik Pinngortitamillu Ilisimatusarfimmi adjunkti, DKK 100.000,-inik aningaasaliiffigineqarpoq ilisimatusarluni suliniummut "Fastholdelse af flere sygeplejersker i uddannelse og arbejdsliv"-imut atugassanik.

Ilisimatusarluni suliniut peqqissaasutut atorfillit maani najugaqartut, Kalaallit Nunaanni marlunnik oqaaseqartoqarneranik kulturimillu ilisimaarinnittut amerlanerusut Kalaallit Nunaanni innuttaasunit pisariaqartinneqarnerannut tunngavoq - pingaartumik innuttaasut peqqissuujuartinniaraanni peqqinnerulersinniaraanniluunniit. Massakkorpiaq peqqissaasunngortartut naammanngillat. Ilinnialernissamut akuerisaasartut killeqartarput piumasaqaatinut naapertuuttumik siunnersuisulinnik 14-iinnarnik praktikkerfissaqarmat. Tamatuma saniatigut ukiuni kingulliunerusuni ilinniartunit arfineq-pingasunit arfineq-marluk ilinniakkamik naammassinnittarsimapput.

Taamaattumik suliniummut siunertaavoq praktikkerfissanik amerlanerusunik pilersitsinissamut periarfissaqarneranik misissuinissaq sammisassanillu ilinniartut peqqissaasunngoqqammersullu ingerlatsiinnarnissaannik ingerlalluarnissaannillu siuarsaasinnaasunik ineriartortitsinissaq. Suliniummi periuserineqartut sammineqartartullu ingerlaavartumik ineriartortinneqartarput ilisimatuut, ilinniartitsisut, peqqissaasunngorniat, peqqissaasunngorlaat peqqissaasullu misilittagaqarluartut suleqatigiinnerisigut.

Trine Abelsen, ilisimatooq Ilisimatusarfimmut atassuteqartartoq, DKK 89.815,-inik aningaasaliiffigineqarpoq ilisimatusarluni suliniummut "Forekomst og sværhedsgrad af senfølger efter COVID-19 infektion i Grønland" atugassanik.

Ilisimatusarluni suliniummut siunertaavoq COVID-19-imik tunillatsinnermit kingunerlutsitsinerit qanoq atugaatiginerannik, sivisussusiannik qanorlu atupilunneqartigineranik misissuinissaq kiisalu Nuummi SARS-CoV-2-mik tunillatsinnerup kingorna ukiup ataatsip ingerlanerani kingunerlutsitsinerup aarlerinartuinik innuttaasunut naapertuuttumik sinniisunik misissuinissaq.

Christoph Hare Svenstrup, Oqaasilerinermut, Atuakkialerinermut Tusagassiuutilerinermullu immikkoortortami adjunktiusoq, DKK 62.425,-inik aningaasaliiffigineqarpoq ilisimatusarluni suliniummut "Oqaatsit ilinniarnerlu Nuummi"-mut atugassanik.

Suliniummi sammineqarpoq oqaatsit nuttarnerlu imminnut qanoq atassuteqarnersut, ilinniagaqarnissamut periarfissatut isigalugit. Misissuinermi kalaallit inuusuttortaasa Nuummi ukiuni marlunni siullerni GUX-ernerisa aallartinnerani malinnaavigineqassapput makku sukumiisumik allaatigisinnaajumallugit: i) oqaatsit ulluinnarni taakkua atugaat, ii) Nuummi GUX-imi ulluinnarni peqatigiinnerat, aamma iii) nuttarnissamullu periarfissaat.