Pinngortitamut tunngasunik nunalerutini ilinniartitsisut arfineq-pingasut nutaat

Marlunngormat decembarip 5-ani pingasunngornermilu decembarip 6-iani ilinniartitsisunngorniat arfineq-pingasut fagitut qinigartik 'pinngortitamut tunngasunik nunalerutit' inaarpaat. Ukiuni pingasuni affarmilu kingullerni pinngortitalerinermi tunngaviusumik ilinniagaqarsimallutillu pinngortitamut tunngasunik nunalerutinut suliassaqarfiup iluani immikkut ilisimasaqalersimapput.

Suliassaqarfinni soorlu apummut aamma sermilerinermut, nunarsuup sannaani kaaviaartunut, ujaqqanut aamma aatsitassanut, uumasut najugaannik misissuinermut aamma silamut, silap pissusianut silallu pissusiata allanngoriartorneranut tunngasunik ilinniartitsinissaminnut pilersaarusiornissamut, naammassinninnissamut nalilersuinissamullu ilinniarnerminni piginnaasaqalersimapput.

Ilinniagaasa ilisarnaataat pingaarneq tassaasimavoq suliaqarnikkut suliassaqarfimmullu tunngasunik sammisaqarnikkut ilinniartinneqarneq, taakkunani siunertarineqarluni meeqqat paasisaqarusulernissaat tupigusunnissaallu aammattaaq pinngortitaq aamma pinngortitamut tunngasunik nunalerutit meeqqat ilikkagaqarfiginerunissaat.

Pinngortitamut tunngasunik nunalerutini ilinniartitsisunngorlaat arfineq-pingasut nunatsinni meeqqat atuarfianni atuartunut allannguerusussuseqangaarlutik atuarfinni sulilissapput.

Ilinniartitsisunngorniat arfineq-pingasut taakkua ilinniartitsisutut ilinniagartik tamakkerlugu 2024-mi aasakkut naammassinissaat naatsorsuutigineqarpoq.

• Assi, saavani saamerlermit: Nukannguaq Olsen, Tukummeq Poulsen, Nuka-Otto Thomsen
• Assi, qeqqani saamerlermit: Bjarne Martinsen, Ane Grethe Rosing, Gigi Jensen, Karina Abelsen, Max Sandgreen
• Assi, tunorleq: lektori Lars Demant-Poort