Ukraine Ilisimatusarfimmi

Russit tiguaanerat demokratiimi naleqartitatsinnut ileqqutsinnullu tamanut eqqissillutalu inooqatigiissinnaanitsinnik tunngaviusumik upperinninnitsinnut akerliulluinnarpoq.

Ruslandip sorsunnermik ingerlatsinera Belarusillu toqqaannartumik tapersersuinera Ilisimatusarfimmit assuarineqarluinnarpoq, Network of Universities of Small Countries and Territoriesimut ukuninnga ilaasortalimmut isumaqataalluni suleqataanikkut (assuarinnissut uani atuaruk):

• University of Akureyri
• University of Andorra
• University of the Faroe Islands
• University of Gibraltar
• University of Greenland
• University of Liechtenstein
• University of Malta
• Mediterranean University of Montenegro
• University of Montenegro
• University of Nicosia
• University of San Marino

Aap, allakkatigut assuarinnittoqarsinnaalluarpoq - suliniuteqavinnerli allarluinnaavoq.

Massakkorpiaq Ukrainemi toqqaannartumik suleqateqanngilagut - nunatsinnili Ukrainemilu siunersiueqatigisartagaqarnikkut maani Ilisimatusarfimmi ilinniartitsisumik ilinniartunillu marlunnik Ukrainemi universitetimeersunik tikeraartoqarnissamut periarfissaqarnersoq massakkorpiaq misissorparput.

Periarfissaqassappat ukioq manna apriilimiit tikeraartoqalissaagut.

Qularnanngilaq imaannaanngitsorsiornartoqassasoq - assersuutigalugu semesteri aallartereersimassaaq il.il. - uagulli nammineq isumarput naapertorlugu ingasannavianngillat, piffissallu ingerlanerani aaqqiivigineqarsinnaalluarsoraavut.

Uagut ilinniarfittut inunnut qaammaterpassuarni sorsunnermi annilaanganartorsiornermik ulluinnarsiuteqarsimasunut neqerooruteqangaarsinnaanngikkaluarluta Ukrainemit aarlerinartorsiorfiusumit - aarlerinartunit inuttut uagut paasilluarsinnaagunanngisatsinnit - qimagukkallarnissamik neqerooruteqarsinnaavugut.

Ulluinnarnut utertutut misigiffigisinnaasaannik toqqissisimanarnerusunik avatangiiseqarallarsinnaassapput.

Tamanna aallartilluarfigissavarput iliuuseqalaarnissamullu periarfissarissallutigu.

Tamatta inuuvugut nunat killeqarfii, kulturit, upperisat il.il. akimorlugit siaruarsimasut.

Isumaqarpugulli inuppalaassutsip kattutitissinnaagaatigut - pissutsit isumalluarnanngikkaluarpataluunniit.