Isumaginninnikkut Ataatsimeersuarneq II peqatigiinnernik nunallu tamalaat akornanni attavinnik nukittorsaataavoq

Sapaatip akunnerata siuliani Isumaginninnikkut Ataatsimeersuarnermi II-mi inuiaqatigiit atugarissaarnissaat pillugu suliatigut tunngasunik 40-t sinnerlugit saqqummiisoqarnera 150-nik peqataasoqartitsivoq.

Ilisimatusarfiup Issittumi Atugarissaarneq Pillugu Ilisimatusarfiata Isumaginninnikkut Ataatsimeersuarneq II ingerlateqqammerpaa, tassani ileqquliussatut isumaginninnikkut ataatsimeersuarneq, 2021-mi Perorsaanermik Ilinniarfimmit Kofoeds Skolemiillu aallarnerneqarsimasoq, ingerlanneqarpoq.

"Peqatigiinnerit Nukittuunik" qulequtserlugu Isumaginninnikkut Ataatsimeersuarneq II isumaginninnikkut ilisimatusarnermut ataatsimiiffissuartut imminut malunnartissimavoq, ataatsimeersuarnermi ilisimasanik ingerlatitseqqinneq qitiutinneqarpoq aamma suleriaatsit ilisimatusaatillu akornanni ilisimasanik avitseqatigiittoqarnissaanut periarfissaqarluarsimavoq.

Ataatsimeersuarnermi qulini assigiinngitsuni ataatsimiisitsisoqarlunilu 40-t sinnerlugit saqqummiisoqarpoq, atugarissaarnissamut makkununnga sammisaqarfiusunik: isumaginninnermut politikki, perorsaanermik ilisimatusaatit, atuarfik, meeqqat inuusuttullu atugarissaarnissaat, angerlarsimaffeqannginneq, inuit innarluutillit, pinerluttuliortarneq inuuniarnikkullu ajornartorsiutit.

Saqqummiinerit malunnaatillit ilaat tassaasimapput professori Cindy Blackstock aamma professori Suzy Basile pingaarnertut saqqummiimmata, taakkua marluullutik Canadaminngaanneerput. Atugarissaarnissaq pillugu sulinermi meeqqat tusarnaarneqartarnissaat peqataatinneqartarnissaallu pingaaruteqarnera aamma arnat nunap inoqqaavisut tunuliaqutillit akuersitinneqaratik kinguaassiorsinnaajunnaarsitaasimasut pillugit ilisimatusarnermit Canadami ilikkakkat pillugit oqalugiarput.

Isumaginninnikkut Ataatsimeersuarnerup III-p 2025-mi novembarimi ingerlanneqarnissaa Ilisimatusarfiup Issittumi Atugarissaarneq Pillugu Ilisimatusarfiata sulissutigilereerpaa, tassani isumaginninnermut suliassaqarfiup iluani ilisimasat siuarsarneqarnissaannut pisussaaffik, suleqatigiinneq nutaaliortarnerlu qitiutinneqassapput. Peqataanissamut allatsinnissamullu paasissutissat, ukioq mannatuut, aviisimi inuillu attaveqatigiittarfiini kiisalu ilisimatusarfiup aamma Ilisimatusarfiup Issittumi Atugarissaarneq Pillugu Ilisimatusarfiata nittartagaanni piffissaq sioqqulluarlugu nanineqarsinnaajumaarput.

Ataatsimeersuarnerup ilaa Ilisimatusarfiup Issittumi Atugarissaarneq Pillugu Ilisimatusarfianit kiisalu NunaFondenimit aningaasalersorneqarpoq.

Paasisaqarnerorusukkuit apersuerusukkuilluunniit ukununnga attaveqarnissannut qinnuigissavatsigit: Ilisimatusarfiup Issittumi Atugarissaarneq Pillugu Ilisimatusarfianeersut Tenna Jensen aamma Steven Arnfjord uunga icav@uni.gl oqarasuaammut angallattakkamulluunniit +299 58 67 10-mut.