Nunatta Danmarkillu akornanni pissutsit pillugit oqaluttuarisaanermik qulaajaaneq

Sorsunnersuaq kingullermit maannamut Nunatta Danmarkillu akornanni pissutsit pillugit oqaluttuarisaanermik qulaajaaneq 9. juni 2022-mi ataatsimoorussamik nalunaaruteqarnikkut aallartinneqassasoq Naalakkersuisut Danmarkimilu naalakkersuisut aalajangerpaat.

Nunatta Danmarkillu akornanni pissutsit pillugit oqaluttuarisaanermik qulaajaalluni ilisimasat tunngavigalugit ataatsimoorussamik suliaqarneq oqaluttuarisaanerup qulaajarneqarnissaanut paasineqarnissaanullu tapersiissaaq, aamma aalajangerneqarsimasut iliuuserineqarsimasullu kingunerisaannik nassueruteqartoqassaaq pereersut pillugit saammaateqatigiissinnaaneq taamatut iliuuseqarnikkut tunngavissiuunniarlugu.

Politikkikkut aalajangikkat pingaaruteqartut, pisimasut aamma pissutsit allat, iliuuserineqartut aamma ingerlanerit nunatta ineriartorneranut nunatta Danmarkillu akornanni pissutsinut sunniuteqaqataasut, imaluunniit nunatsinni innuttaasunut kinguneqartut qulaajaanermi sammineqassapput.

Nunatsinni Ilisimatusarnermik Siunnersuisoqatigiit aamma Danmarks Frie Forskningsfond-ip inassuteqaateqareernerisigut ilisimatusarnermi siulittaasuusussaq Ilinniartitaanermut, Kultureqarnermut, Timersornermut Ilageeqarnermullu Naalakkersuisup ilisimatusarnermullu ministerip ataatsimoorlutik toqqarpaat. Ammasumik ataatsimoorussamik allagarsiineq tunngavigalugu piukkunnartut amerlanngitsut inassuteqaammut ilaatinneqassapput.

Ilisimatusarnermi siulittaasuusussaq Ilisimatusarfimmit atorfinitsinneqassaaq.

Suliakkiissut atuaruk.