Kalaallit Nunaata nunanut allanut sillimaniarnermullu politikkia pillugu misissuineq nutaaq

Nunanut allanut sillimaniarnermullu politikki pillugu kalaallit isumaannik Ilisimatusarfiup Nunanut Allanut Sillimaniarnermullu Ilisimatusarfiata - Nasiffiup - aappassaanik misissuinini naammasseqqammerpaa.

Misissuineq 2024-mi upernaakkut ingerlanneqarsimavoq, sammisallu soorlu sillimaniarnermut akornutaasinnaasorineqartunut, nunanik allanik suleqateqarnermut aamma nunat pissaanilissuit Issittumi atuuffiannut tunngasut inuiaqatigiit qanoq isumaqarfigineraat misissuinermi immikkut paasisaqarfigineqarsinnaapput.

Misissuinerup takutippaa inuuniarnermut aningaasartuuteqarnerulerneq, suliffissaaleqineq aamma aningaasaqarnikkut inissisimaffik Kalaallit Nunaanni unammillernartut annersarigaat - soorluttaaq 2021-mi aamma taama isikkoqartoq. Kalaallit Nunaata sillimaniarneranut akornutaasinnaasorineqartunut atatillugu sillimaniarnikkut inissisimaffiup aalajaatsuunera inuit amerlanerpaartaasa nalilerpaat - siornatigumulli sanilliullugu sillimaniarnermut akornutaasinnaasut maanna annertunerusutut inuit amerlanerusut isigaat.

Kalaallit Nunaata nunanik tamalaanik suleqateqarusulluni, tamatumani Island, Canada aamma Issittumi Siunnersuisooqatigiit suleqatigisassatut piumaneqarnerullutik, kissaateqarneranik misissuineq aamma pissanganartunik paasissutissiivoq. Tamanna ilutigalugu amerlanerussuteqartut NATO pingaarnertut sillimaniarnikkut iligineqartutut isigaat.

Nalunaarusiaq tamaat atuaruk Kalaallit Nunaatalu siunissami nunanut allanut sillimaniarnermullu politikkissaanut tunngatillugu inuiaqatigiit isumaat immikkuualuttut paasisaqarfigalugit.