Angerlarsimaffeqanngitsut atugaat pitsanngorsaaviginiarlugit ukiuni pingasuni ilisimatusaatigalugu suliniut 4,8 millionit koruuninik aningaasaliiffigineqartoq

Angerlarsimaffeqannginnerup unammillernartortaasa aaqqiivigineqarnissaannut annertuumik suliniuteqarnissamut, Kommuneqarfik Sermersuup suleqatigineratigut, ilisimatusaatigalugu suliniut Ilaassaagut maanna suliniuteqarluni aallarniivoq.

Ilaassaagut OAK Foundation Denmarkimit tukkortumik tapiiffigineqarpoq Ilisimatusarfiullu Issittumi Atugarissaarneq Pillugu Ilisimatusarfianit ingerlanneqarluni - suliniut 2024-mit 2026-mut ingerlanneqassaaq.

Innuttaasunik inuuniarnikkut ajornartorsiortunik peqataatitsisarneq, aqqusinermi angalaarlutik aamma angerlarsimaffeqanngitsunut unnuisarfinni sulisut ilinniartinneqarnissaat, aamma angerlarsimaffeqannginneq pillugu suliassaqarfiup iluani piffissamut ungasissumut aaqqiissuteqarnissamut aalajangiisartunik oqaloqateqartarneq nukittorsarumallugu paasissutissanik misissueqqissaartarnissaq suliniummi pingaartinneqartutut ilaapput.

"OAK Foundation Denmarkip annertuumik tukkortumillu aningaasaliinera qujamasuutigaarput - najukkamilu inuiaqatigiit peqatigalugit piviusumik allannguinissatsinnut qilanaarpugut," Issittumi atugarissaarneq pillugu ilisimatusarfiup pisortaa Steven Arnfjord taama oqarpoq.

Inuit angerlarsimaffeqannginnermik eqqugaasut qitiutinniarlugit aamma maligassiuisutigut, ilinniagaqartitsinikkut neqeroorutinillu attuumassuteqartunik ineriartortitsinikkut inuunermik namminersorluni aqutsisinnaanerup siuarsaavigineqarnissaa anguniarlugit suliniut ilusilersorneqarsimavoq. Peqataatinneqarneq aamma nammineq siunissamik ingerlasseqataanissaq suliniutip ingerlanneqarnerani pingaarutilittut tunngavigineqassapput.

Pisaatsinut tunngasunut piffissamullu ungasissumut aaqqiissutissanut tapersiiumalluni suliniutip ingerlaarnera nalunaarsorneqartassaaq. Tamanna Kommuneqarfik Sermersuumut taamaallaat iluaqutaajunnaanngilaq, suliniutilli Ilaassaagut naammassereerpat kommunit allat assingusunik suliniutinik aallarniinissaannut isumassarsiorfigineqarsinnaalissaaq.

Isumaginninnermik suliassaqarfiup iluani pisariaqartinneqartut erseqqissarumallugit suussuserumallugillu Ilisimatusarfiup Issittumi Atugarissaarneq Pillugu Ilisimatusarfiata suleqatitik aamma suliassamut immikkut ilinniarsimasut suleqatigissavaat. Housing first-imik aamma angerlarsimaffeqanngitsut unnuisarfiinik aaqqiissuteqartoqarnissaa pillugit ingerlaavartumik siunnersuisoqartarlunilu siunersiuisoqartassaaq - aammattaaq isumaginninneq pillugu ataatsimeersuartitsisoqartarumaarpoq, tassani soqutigisaqatit inuillu angerlarsimaffeqannginnermik eqqugaasut inuuniarnermi ajornartorsiutit aamma isumaginninnermut politikki oqallisigisassavaat.

Isumaginninnermi suliniutit pitsanngorsaavigineqarnissaannut angerlarsimaffeqannginnerlu pillugu suliassaqarfimmi atugassarititanik pitsaanerusunik pilersitsisoqarnissaa suliniummi siunertarineqarput.

Suliniut Ilaassaagut pillugu paasisaqarnerorusukkuit - aamma apersuerusullutit saaffiginnikkusukkuit - qinnuigissavatsigit Ilisimatusarfiup Issittumi Atugarissaarneq Pillugu Ilisimatusarfiani Steven Arnfjord e-mailimut uunga attavigeqqullugu star@uni.gl.