Nunaviup Ilinniartitsinermik Ilisimatusarfik tikeraaraa

Allattoq Sabine Christiansen

Sapaatip akunnerani 16-imi sisamanngornermi tallimanngornermilu aamma sapaatip akunnerani 17-imi ataasinngornermiit pingasunngornermut Ilinniartitsinermik Ilisimatusarfik ilinniartitsisunngornianik Canadami Nunavimmeersunik 10-nit aqutsisunillu marlunnit tikeraartoqarpoq. Ilinniartut taakkua Nunaviup nunaqarfiini najugaqarlutillu ilinniartitsisarput. Ilinniartut nangitsiviusumik ilinniarlutik Québecimi ilisimatusarfiup ataanniipput.

Tikeraarnermut siunertaq ilaatigut tassaavoq Kalaallit Nunaanni ilinniartitsisutut ilinniakkami ilinniartinneqarnermi peqataanissaq - aamma suleqateqarnissamut periarfissartalimmik nunatta ilinniartitsisutut ilinniarfianik atuarfiullu silarsuaanni attaveqateqalernissaq siunertaralugu Nuummi atuarfiit pulaarneri.

Silarlunnera peqqutaalluni tikeraat ullormik ataatsimik ajoraluartumik kinguaattoorput, taamaasillutik ilinniartut canadamiut pilersaarummi ulloq siulleq peqataaffiginngitsoorpaat. Ilinniartitsisutulli ilinniakkami fagit assigiinngitsut pulaarnissaat angumeraat, tamassumunnga ilanngullugu ilinniartuutitta ilaata aallarniineratigut aamma ilinniartitsisuisa tapersersuinerisigut nerisassiornermi fagimi malaatiinnarlugu peqataaneq.

Ilinniartinneqarnermi peqataanerup saniatigut Ilimmarfimmi aamma ataatsimut ulloqeqqasioqatigiittoqarpoq, tassani kalaallit mamartuliaat sassaalliutigineqarlutik. Tassani suleqatit, tikeraartoqarnermi toqqaannartumik peqataanngitsut, tikeraat ilassinissaannut persuarsioratillu oqaloqatigiinnissaminnut periarfissinneqarput.

Ukiut pingajussaanni tuluttut ilinniartut Ilinniarfissuarmi ulloqeqqasioqatigiinnissamut Canadamiit tikeraat qaaqquaat, tamassumalu kingorna Nuummi takornariartillugit.

Sapaatip akunnerani 17-imi ataasinngornermiit pingasunngornermut Nuummi atuarfiit pulaarneqarput.

Ilinniartut canadamiut atuarfiit pulaarnissaannut qilanaangaatsiarsimapput pulaarnertillu ilikkagaqarfiulluarsimasoq oqaatigaat.

Ilinniartut canadamiut ilinniagartik, nunaqarfitsik kulturertillu ataatsimut isigalugit ilinniartuutitsinnut ilinniartitsisunullu saqqummiussinerannik Nunavimmit tikeraarneq naggaserneqarpoq.

Peqataasut tamarmik ataatsimut isumaqarput Nunavik Kalaallit Nunaallu ajunngitsunik ajortunillu assigiissuteqangaatsiartut.

Ilinniartuutitta, suleqatitta tikeraattalu oqaatsitik namminneq atorlugit qanoq imminnut paasisinnaatiginertik immikkut nuannersumik aamma tupaallaatigaat.

Canadamiit tikeraat saqqummiunneqartunut ammaffiginningaarnertik soqutiginninnertillu takutippaat, qiimmattaateqarluarnermikkullu ilaminnik isumagissaartitsilluarlutik.

Tikeraartoqaqqinnissaanik periarfissartalimmik Québecimi ilinniartitsisutut ilinniarfimmik attaveqateqaannarnissamut, suleqateqarnissamut aamma suliffimmik misiliiartortoqartarnissaanut tikeraarneq aallaaviusoq Ilinniartitsinermik Ilisimatusarfiup neriuutigaa.