Pinngortitamik ilisimatusarnerup iluani ilinniakkamut maanna nunatsinni qinnuteqarsinnaanngorputit: Uumassusilerinermi SILA-mi bachelori

Ilisimatusarfik ilinniakkamik nutaamik ilusilersuisimavoq: Uumassusilerinermi SILA-mi Bachelori - akuerisaanissamullu maanna qinnuteqarsinnaalereerputit.

Kalaallit Nunaanni pinngortitamut immikkut ittumik atassuteqarpugut - tassa imaappoq uumassusillit akornanniikkatta. Inuiaqatigiit aningaasaqarnitsinnut, nerisatsinnut, kulturitsinnut aamma eqqarsartaatsikkut peqqissutsitsinnut pinngortitaq tunngaviuvoq. Taakkuami tamarmik uumassusilerinermi SILA-mi bacheloritut ilinniakkap pingaarnertut immikkoortortarai.

Ilisimatusarfiup ilaatigut Pinngortitaleriffiup suleqatigineratigut uumassusilerinermi bacheloritut ilinniagaq pilersissimavaa, ilinniagarlu Kalaallit Nunaanni, pinngortitaani kulturiannilu aallaaveqarpoq.

Ilinniartut aavariassapput, assaasa puisit naavi attussavaat Kalaallit Nunaannilu suliffeqarneq pillugu ilinniassallutik. Pinngortitami aamma laboratoriami uumassusilerinermi pisaatsit ilinniartut misilittagaqarfigilissavaat, uumassusilerinerullu iluani ilisimasaqalernissaminnik ilisimasaminnillu paasissutissiortarneq ilinniassallugu.

Ilinniakkami pingaarnertut sammisat pingasuupput:

• Pinngortitap pisuussutaanik ingerlatsineq. SILA-mi bachelori avatangiisinut inuiaqatigiinnullu tunngasutigut piujuartitsisumik pinngortitap pisuussutaanik aqutsinermik suliaqarsinnaalissaaq. Inatsisit atuuttut aamma suleriaatsit pillugit ilinniartoq aalajangersimasumik ilisimasaqalissaaq. Ilisimasat assigiinngitsut ingerlassinermut ilanngunneqarnissaasa pingaaruteqassusaat ilinniartup ilikkagaqarfigissavaa, tamassumunnga ilanngullugit ilisimatuut pisiniartullu ilisimasaat. Ingerlatsinerup iluani soqutiginnittut tamarmik ilinniartup misilittagaqarfigilissavai, tamassumunnga ilanngullugit allaffissornikkut ingerlatsineq, politikkikkut aaqqissuussaaneq, aalisartut, piniartut aamma ilisimatusartut.
• Silap pissusiata allanngoriartornera. Issittumi silap pissusiata maanna allanngoriartornera aamma tamassuma pinngortitami pissuseqatigiinnermut, inuiaqatigiinnut aningaasaqarnermullu sunniuteqarnera ilinniartup sukumiinerusumik paasisimasaqarfigilissavai. Nunani allani nunatsinnilu suliniutit, nalunaarusiat aamma kattuffiit silap pissusiata allanngoriartorneranik aallussaqartut naleqquttut ilinniartup paasisimasaqarfigilissavai. Silap pissusia pillugu paassissutissat aamma silap pissusianik ilisimatuutut misissuineq ilinniartup misilittagaqarfigilissavai.
• Peqqissuseq Pinngortitarlu. Kalaallit Nunaanni inuit aamma pinngortitap ataqatigiinnerat pillugu ilinniartoq paasisimasaqalissaaq, tamassumunnga ilanngullugit nerinermut kulturi, nunaateqarneq, piniarneq aalisarnerlu, pinngortitap peqqissutsimut iluaquteqartumik sunniutai, aningaasaqarnikkut ilippanartut aamma kulturimut pingaaruteqassusaat.

SILA-mi uumassusilerinermi bachelorinngorniarnissamut maanna qinnuteqarsinnaalereerputit - qinnuteqarnissamut piffissaliussaq tassaavoq novembarip aallaqqaataat 2024.

2025-mi februaarip aallaqqaataani ilinniagaq aallartissaaq qilanaarpugullu!