Dr. April Winifred Marshallip eqqaassutissatut aningaasaateqarfia tapiissuteqartoq

Ilisimatusarfiup qujamasuutigingaakkaminik Dr. April Winifred Marshallimit kingornussisimavoq, maanna Dr. April Winifred Marshallip eqqaassutissatut aningaasaateqarfinngorsimasumik.

Legati ukiumut marloriaq qinnuteqarfigineqartarpoq, qinnuteqarnissamullu killigititat tassaapput martsip 15-iat aamma oktobarip 15-iat.

Siunertarineqartoq tassaavoq ilinniarfinni ingerlaqqiffiusuni imaluunniit ilisimatusarnermi sikumi alapernaarsuinermut aamma sermilerinermut sammisaqarfiusunut atatillugu Ilisimatusarfimmi arnanut Inunnut sulisunut ilinniartunullu tapersiinissaq.

Qinnuteqarnissamut killigititami oktobarip 15-iani qinnuteqaatit pingasut pissarsiarisimavagut.

Qinnuteqaatit tiguneqartut tunngavigalugit suliniutip Lars Demant-Poortimit nassiunneqarsimasup tapiiffiginissaanut aqutsisut akerliusoqaratik akuerivaat.

Suliniut taanna ilinniartitsisunngorniarfimmi ilinniartunut arnanut tallimanut Kalaallit Nunaata Sermersuaa pillugu - Point 660-mi (Kangerlussuaq aamma Russell Glacier) - ilisimasaqalernissaannut suliatigullu misilittagaqalernissaannut immikkuullarissumik periarfissiivoq.

Tamatuma saniatigut ilinniartitsisunngornianit sammineqartartumut siku pillugu atuartitseriaasimut ineriartortitseqataassaaq.

Suliniummut DKK 89.900-t aningaasaliissutigineqarput, inernissaalu soqutiginningaarluta takunissaat qilanaaraarput.

Dr. April Winifred Marshallip eqqaassutissatut aningaasaateqarfianut qinnuteqarnissamut killigititap tullia tassaavoq martsip 15-iat 2025.