Aliasuuteqartunut siunnersortitut ilinniarsimasut siulliit 13-it naammassisut

Diplomimut ilinniakkap moduliani aliasuuteqartunut siunnersuinermut tunngassuteqartumi nutaarluinnarmi septembarimi ilinniartut 13-it siulliit aallartipput - taakkualu tamarmik misilitsinnerminni angusisimanertik nalliuttorsiutigeqqammerpaat.

Taamaasillutik maanna Ilisimatusarfimmi aliasuuteqartunut siunnersortitut pisortatigoortumik siullerpaatut ilinniarsimasunngorput.

Ilisimatusarfittut suliffeqarfiullu suleqatigisatta nukittuumik pilersitsilluarfiusumillu suleqatigiinnitsinni moduli tamanna angusamik pingaarutilimmik ersersitsivoq.

Modulip ingerlanerani ataasinnguamilluunniit taamaatiinnartoqarsimanngilaq - tamannalu peqataasut tunniusimanerannik aamma suliassaqarfiup tamatuma naleqquttuuneranik ersersitsivoq.

Ilinniakkap taassuma nunatsinni ilinniarsimasutut sulisunut inunnullu aliasuuteqartunut qanoq allanngueqataatiginera maannangaaq malugisinnaavarput.

Aliasuuteqartunut siunnersortinngorlaat nunarput tamakkerlugu ilisimasanik pingaarutilinnik, nukittuumik piginnaasaqarnermikkut suliassaqarfiullu iluani kivitseqataanermikkut tapersiissapput.

Aliasuuteqartunut siunnersortinngorlaat 13-it tamaasa pilluaqqungaarpagut - angusaq tamanna nunatsinni aliasuuteqartunut siunnersuinermi siumut alloriartitsivoq.