Ilisimatusaat Ilisimatusarfimmeersoq ilisimatusaatini nuimanerpaani tallimani ilaasoq

Danskit ilisimatusarnerini Ilisimatusarfik kusanaqisumik takutinneqartoq.

Tallimanngornermi decembarip 19-ani 2025 danskit atuagassiaanni Ingeniørenimi ukioq manna ilisimatusaatini nuimanerpaat tallimat (Videnskabens Top 5) saqqummersinneqaqqammerput - ilisimatusaatigalugu suliniut QIMMEQ taakkua ilaanniippoq.

Aalborg Universitetimit suliniut Microflora Danica ukioq manna ajugaasuuvoq.

2004-miilli Ingeniørenimi aaqqissuisoqarfiup ukiut tamaasa ilisimatusarnernit inernerit tallimat toqqartarpai, taakkualu ukiup ingerlanerani immikkut malunniuteqarsimasutut nalilersorneqarsimasarput. Taasisarneq tamanna nunat tamalaat atuagassiaannut Science-mut taassumalu Breakthrough of the Year-iannut akuerineqartumut assinguvoq.

Ukioq manna ilisimatusarnernit inernerit tallimat suliassaqarfitsigut siammasipput makkualu soorlu sammineqarput: kingornuttakkerineq, kissarnerup elektricitetillu magnetiisa qinngornerinut teknologi, tappiorannartulerineq, isaannarmik takuneqarsinnaanngitsumik teknikkikkut ilisimatusarneq kiisalu laserinik holografimillu teknikkikkut ilisimatusarneq. Taakkua tamarmik assigiissutaat tassaavoq ing.dk-mi itinerusoq tikillugu allaaserineqarlutik saqqummiunneqarsimammata - aammattaaq ilisimatusarfiit arlallit suleqatigiinnerisigut ilisimatusarnernit aallaaveqarmata.

Taakkualu ilaat nunatsinnit aallaaveqarpoq.

Ilisimatusaatigalugu suliniut QIMMEQ, kalaallit qimmit qimuttuisa kingornuttakkatigut oqaluttuarisaanerannik kulturikkullu pingaaruteqassusaannik misissuisuusoq, Københavns Universitetimi Globe Institutip aamma Ilisimatusarfiup suleqatigiinnermikkut suliniutigaat. Suliummi nunat tamalaat ilisimatusarnerat aamma najugaqarfimmi ilisimasat qanimut sunniivigeqatigiitsinneqarnerat tunngavigineqarpoq - ataqatigiissitsinerlu taannarpiaq suliniut ukioq manna ilisimatusarnerit inernerini malunnaateqarnerpaat tallimanut ilanngunneqarsinnaasunngortissimavaat.

Ilisimatusaatini nuimanerpaani tallimat akornanni qinigassanngortinneqarneq ersarissumik nersorniaaneruvoq. Suliniummi ilisimatusaatitigut inerneriinnaanniinnaanngitsoq, aammattaarli tamatuma tunuliaqutaatut piffissami sivisuumi ilisimatusarfiillu akimorlugit suleqatigiinnermik nersorniaaneruvoq. Tamannalu ilutigalugu Kalaallit Nunaat aallaavigalugu ilisimasanik nutaanik pilersitsiniarlutik ullut tamaasa suliniuteqartunik, ilisimatusartunik tamanik, erseqqilluartumik nersualaarinninneruvoq.

Suliniummi QIMMEQ-mi ilisimatusaqataasut tamaasa Ilisimatusarfiup pilluaqqungaarpai.