Ilisimatusarfiup siulersuineq nukittorsaraa: Inuit nuimasut marluk instituttini pisortanngortinneqartut

Ukiup 2026-p aallartinnerani Ilisimatusarfiup inuit misilittagartuut aqutsisutullu ilisarnaatillit marluk instituttini pisortatut tikilluaqqussavai. Peqqissaanermik Pinngortitamillu Ilisimatusarfimmi Lone Nukaaraq Møller instituttimi pisortanngortoq, rektoriusimasoq Gitte Adler Reimer Kulturimik, Oqaatsinik Oqaluttuarisaanermillu Ilisimatusarfimmi instituttimi pisortanngorluni sulileqqissaaq.

Taakkuninnga marlunnik atorfinitsitsinermi Ilisimatusarfiup ineriartortinneqarnerani nukittorsarneqarneranilu pingaarutilimmik alloriarneq ersersinneqarpoq - tassa suliatigut, periusissiatigut aaqqissugaanikkullu.

Lone Nukaaraq Møller uumassusilerituutut ilinniarsimasuullunilu Uumasunik nakorsaanermi ph.d.-gradeqarpoq. Tamatuma saniatigut pisortatigut ingerlatsinerup kommunillu silarsuaanni aqutsinermik misilittagaqarluarpoq. Lone Peqqissutsimut Naalakkersuisoqarfimmi aammattaaq Ilinniartitaanermut, Kulturimut Ilageeqarnermullu Naalakkersuisoqarfimmi pisortaanikuuvoq - 2020-miillu Kommuneqarfik Sermersuup Meeqqanut Atuarfeqarnermullu Ingerlatsiviani maanna pisortaalluni.

Lone 2026-mi februaarip 15-iani instituttimi pisortatut aallartissaaq.

Tamanna ilutigalugu Gitte Adler Reimer Ilisimatusarfik ilisimatusarfittullu atuuffia pillugu iternga tikillugu ilisimasaqarluartoq Ilisimatusarfimmut utissaaq. Gitte Kulturimik, Oqaatsinik Oqaluttuarisaanermillu Ilisimatusarfimmi instituttip pisortaatut ilisimatusarneq, ilinniartitsineq suliatigullu ineriartortitsineq qanillugit sulileqqissaaq.

Gitte 2026-mi januaarip 1-ani instituttip pisortaatut aallartissaaq.

Ilisimatusarfimmi rektorip, Mari Kleistip, atorfinitsitsinerit nuannaarutigai:

"Aqutsisut marluk nukittungaartut piginnaasaqarluartullu atorfinitsissinnaagatsigit nuannaarutigeqaarput. Lone Nukaaraq Møller aamma Gitte Adler Reimer tamarmik immikkut misilittagartuujupput, suliamut piginnaasaqarput iliuusissiortumillu tamakkiisumik isiginnillaqqillutik. Suleqatigiinnissatsinnut assut qilanaarpunga, qularinngilaralu tamarmik marluullutik Ilisimatusarfiup ineriartortinneqarneranut annertuumik tapersiiumaartut."

Ilisimatusarfiup instituttini pisortat marluk nutaat tikilluaqqunissai - aamma ukiumit nutaamit pilersitsilluarfiusumik qanimut suleqatiginissai - qilanaaraa.

Inussiarnersumik inuulluaqqusillunga,

Mari Kleist, rektori