Ilisimatusartoq nunatsinniik NP-imi paasiniaaqatigiinnermut peqataavoq

Ilisimatusarfimmi sillimaniarnerermut politikkimut ilisimatusartoq, Hans Peder Kirkegaard, NP (Naalagaaffiit Peqatigiit) Nunat Inoqqaavisa Pisinnaatitaaffii pillugit ilisimasaqarfimmit (EMRIP) qaaqquneqarluni akerleriinnerit akerleriinnerillu kingorna Nunap Inoqqaavisa pisinnaatitaaffiisa inissisimaneri pillugit paasiniaaqatigiinnermi peqataasoq.

Paasiniaaqatigiinneq decembarip pingajuanit tallimaanut Geneva, Schweiz-imi pivoq.

Paasiniaaqatigiinnermi akerleriinnerit akerleriinnerillu kingorna sammineqarput, akerleriinnerit ima paasillu: Sakkulersornerit, sorsunnerit, nunamik tingusineq, nuutsitaanerit, nunasiaataaneq, aatsitassarsiorneq, naqisimaneqarnerit, silallu allanngoriartornera. Akerleriinnerup kingorna ima paasillugu: ajoqusernerit taaneqartut kingorna pissutinik aaqqiiniarluni suliniutit, soorlu utoqqatsernerit, taarsiinerit, eqqartuussinerit, eqqissiniarnermik eqqortumillu naapertuiniarnermik suliniutit.

Hans Peder Kirkegaard-ip sillimaniarnermik politikkimik ilisimatusarnermini misissukkani ilai avitseqatigissutigai. Nunat ajortumik siunertallit sunniiniarlutik sulisariaasiannik mianerisissanik eqqartuisimavoq. Tassani Isertortumik paasiniaasartut paasissutissaataat isertuussassat Nunap Inoqqaavinut apuunneqarnissai pingaartutut oqaatigivai. Nunap inoqqaavinut attuumassuteqartunik akuersissuteqannginnerini kiffaanngissuseqartumik ilisimatinneqarsimallunilu akuersissuteqarnissamut pisinnaatitaaffik atuutsinneqarsinnaanngilaq ilisimassutissat isertuussassat apuunneqanngippata. Paasissutissammi tatiginartut, eqqortut, ilumoortut tunngavigalugit ingerlatsigaanni sunniiniapiluttut akiorneqarsinnaammata.

"Silarsuarmi maanna pissutsit ima Nunap Inoqqaavinut unammillernartigipput, allaat silap allanngoriartorneranut akiunniarluni atortussat Nunap Inoqqaavisa nunaat tingullugit ingerlanniarneqartut. Naalagaaffiit akornnani sorsunnerit unamminerillu peqqutiginiutigalugit Nunarpassuit naalakkersuisui Nunap Inoqqaavisa pisinnaatitaaffii unioqqutillugit aalajangeeqattaarput". Hans Peder Kirkegaard oqarpoq, nagillugulu "Nunat ajortumik anguniangallit pissutsit taamaattut avissaartitsiniaanermut pisinnaatitaaffinnillu nungusaanermut sunniiniarnermut atornerlussinnaavaat".

Paasiniaaqatigiinneq akerleriinnerit akerleriinnerillu kingorna Nunap Inoqqaavisa pisinnaatitaaffiisa inissisimaneri pillugit misissuinermut ilaavoq. Nunat Inoqqaavisa Pisinnaatitaaffii pillugit ilisimasaqarfik (EMRIP) Nalaagaaffiit Peqatigiit Inuit Pisinnaatitaaffii pillugit Siunnersuisoqatigiivisa 2007-imi pilersissimavaat.

Akerleriinnerit akerleriinnerillu kingorna Nunap Inoqqaavisa pisinnaatitaaffiisa inissisimaneri pillugit misissuinermut ilanngussaqarusuttut januaarip 31-ita tungaanut ugguuna ilanngussisinnaapput.