Issittumi ilisimatusarnermut nutaatut aningaasaliissutit annertuut: Suliniummi nutaami Inughuit ilisimasaat qitiutinneqartut

Ilisimatusarfik Danmarks Frie Forskningsfondip Issittumi ilisimatusarnermut aningaasaateqarfianit 6.451.244 koruuninik aningaasaliiffigiteqqammerpoq. Aningaasat taakkua ilisimatusaatigalugu suliniummut uunga atorneqassapput MITEQ: Inughuit-Directed Responses to Environmental Change in the High Arctic, suliniullu taanna Kalaallit Nunaata Avannaani avatangiisini allanngoriartornernut paasinninnissaq pillugu najugallit ilisimasaannik misilittagaannillu ukkataqarpoq.

Siliniummi Avanersuarmi Inughuit taakkunanilu kinguaariit arlallit Pikialasorsuaq - nunatta Canadallu akornanni imartaq - pillugu ilisimasaat aallaavigineqassapput. Sumiiffik taanna Issittup pinngortitaani pissuseqatigiit ataqatigiittuni pilersitaqarluartarnerpaat ilagaat aammattaaq uumasorpassuarnit inunnillu inuuniarnikkut tunngavigineqartuuvoq. Tamanna ilutigalugu imartaq ullumikkut nanertuuserneqarpoq - tassa silap pissusiata allanngoriartorneraneersumik, politikkikkut aporaannerneersunik killeqarfinnillu isumaqatigiinniarninngaanneersuusunik.

Pikialasorsuaq immikkorluinnaq ittumik imartatut nassuiarneqartartoq suliniut MITEQ nutaamik tamatumunnga isiginnittaaseqalersitsissaaq. Suliniummi sumiiffik taanna inuit avatangiisillu sunniivigeqatigiittarfiattut, ulluinnarni ingerlassanit, ingerlaarnernit, piniariarnernit misilittakkanillu aallaaveqartunik ilisimasanit ilusilersorneqarsimasutut paasineqassaaq. Qangaaniit Inughuit Ilisimasaat aallaaviginerisigut allanngoriartornerit ulluinnarni qanoq maluginiarneqartarnersut, paasineqartarnersut isumagineqartarnersullu suliniummi misissorneqarput.

Ilaqutariit piniartortallit najugaqarfinnilu inuiaqatigiit qanimut suleqatiginerisigut suliniummi sumiiffimmi sulineq, nunaannarmik itsarnisarsiuilluni misissuinerit aamma politikkikkut aalajangeeriaatsit misissoqqissaarneqarneri ataqatigiissinneqassapput. Qangaaniit periutsit aamma oqaluttuarisaanermit takussutissat ataatsimoorussatut eqqaamasatut qanoq aaqqissugaalertarnersut - aamma nalitsinni nunat killingi, malittarisassat naalakkersuinermillu ingerlatsinerit najugaqarfinni pissamaatissanik inuuniarnermilu tunngavissanik pissarsisinnaanermut qanoq sunniuteqarnersut - uppernarsarnissaat siunertarineqarpoq.

Ilisimatusarfik Issittumi inuit avatangiisillu ataqatigiinnerat pillugu ilisimasanik nutaanik MITEQ aqqutigalugu tapersiissaaq. Tamannalu ilutigalugu najugaqarfiup siunissaanik ilusilersuisuusunik politikkikkut allanngoriartuinerni Inughuit nipaannik nukittorsaaqataallunilu nalitsinni silap pissusianik allanngoriartupiloorfioqisumi piujuartitsisumik naalakkersuinermik ingerlatsinernut nutaamik tunngavissiissaaq.

Ilisimatusaatigalugu suliniut pillugu paasissutissanik sukumiinerusunik pissarserusukkuit qinnuigaatsigit uku attavigeqqullugit: rektori Mari Kleist (PI) uunga [email protected], lektori ikiortaasoq Matthew Walls (co-PI) uunga [email protected], imaluunniit studieadjunkti Pauline Knudsen (suliniummi suleqataasoq) uunga [email protected].