Kalaallit qimmiat qimuttoq Guinness Book of Recordsimi toqqarneqartoq

Kalaallit qimmiat qimuttoq annerpaanik angusallit atuagaanni Guinnessimi 2026-mi saqqummersinneqartussami nunarsuarmi qimmini pisoqaanersaat ilaattut toqqarneqarpoq, tamatumani kalaallit qallunaallu Qimmeq pillugu suliniutaanni, Ilisimatusarfimmi aallaaveqartuusumi, inernerit tunngavigineqarput.

Kalaallit qimmiat qimuttoq ataqqinarpaluttoq ukiorpassuanngortuni kalaallit qallunaallu ilisimatusarnermik paasissutissiinermillu suliniutaanni iluatsilluartumi aallunneqarsimavoq. Suliniummi katerillutik peqataasut assigiinngitsuupput tassaasut ilisimatusartut, ilinniartut, uumasut nakorsaat, qimussertartut, ilinniartitsisut, paasissutissiisartut, filmiliortartut assiliisartullu, taakkualu tamarmik assigiimmik anguniagaqarput: Qimmip qimuttup, qimussernermik ileqqutoqqap, qimmip pilerfiata qimmillu Kalaallit Nunaannut immikkuullarissumik isumaqassusaanut tunngasut tamarmik nassuiarnissaat.

Ukiut ingerlaneranni suliniut inernernik saqqummersitsisarlunilu paasissutissiortarsimavoq taakkualu takuneqarsimapput. 2024-p naalernerani suliniut Qimmeq Guinnessip rekortiliinernut atuagaataanit attavigineqarpoq, Guinnessip Kalaallit Qimmiat Qimuttoq nunarsuarmi qimmit assigiinngitsut pisoqaanerpaat allattorsimaffiannut ilanngunniarlugu isumaliutigisimavaa. Qimmillu kingornussisaataannut tunngatillugu suliniummik oqaloqateqareernerminni Guinnessip Qimmeq nunarsuarmi qimmit pisoqaanersaat ilaattut ilisimaneqartutut toqqarsimavaat Guinnessillu rekortiliisunut atuagaataani 2026-mi tamatumalu kingorna ilaasassaaq.

Itsarnisarsiornermi assaanikkut nassaat aamma DNA-nik misissuinerit tunngavigalugit ilisimatusartut uppernarsarsinnaavaat kalaallit qimmiata qimuttup Sibiriami ukiut 9.500-t matuma siorna qimmit qimuttuusimasut ilaqutarigaat Inuillu ukiut 1000-t matuma siorna Berringsstrædemit Kalaallit Nunaannut ikaarnerminni nassarsimagaat.

Nutaarsiassap uuma kalaallit qimussernermi kulturiat immikkuullarissup sammineqarnera annertusissavaa Avannaatalu Qimussersuisa illersuisuat Doris Jakobsen Jensen oqarpoq:

"Uatsinnut qimmit qimuttut Inuillu imminnut qanipput qanittuaannarsimallutillu. Qimminik qimuttunik kultureqarneq qimmerlu qimuttoq kulturitsinni eriaginartuupput, qimmillu qimuttup nunarsuarmi qimmini assigiinngitsuni pisoqaanerpaatut ilisimaneqartutut toqqarneqarnera pissanganarlunilu nunatsinnut ussassaarutitsialaavoq".

Attavissat:

• Manumina Lund Jensen, qimminik qimuttunik kultureqarneq: +299 48 52 00
• Mikkel Sinding, qimmit qimuttut kinguaariit allassimaffiat kingornussisaataallu: +45 29 66 83 55
• Morten Meldgaard, qimmeq qimuttoq pillugu suliniummut tunngasut: +299 58 19 55

Assit pillugit: Kalaallit qimmiat qimuttoq pillugu tusagassiorfinnut nalunaarummut uunga atatillugu assit assigiinngitsut saqqummersinneqarsimapput - uani nassaarikkit.

Assit qimmip qimuttup Guinness Rekordbogimut ilanngunneqarnera pillugu oqaluttuani taamaallaat atorneqarsinnaatitaapput. Assit assinik katersuivinnut ilanngunneqarsinnaanatillu illuatungimut pingajuusumut tunniunneqaqqusaanngillat. Assinik atuinermi assiliisoq allanneqassaaq ima: "Assi: Carsten Egevang".