Ilisimatusarneq, peqatigiinneq & siunissaq

Ilisimatusarfiit marluk Atlantikup avannarpasissuaniittut suleqatigiinnissamik nutaamik isumaqatigiissuteqarput, isumaqatigiissullu qeqertat taakkua marluk akornanni ilinniartitaanermut, ilisimatusarnermut ilisimasanillu avitseqatigiinnissaq annertusassavaat

Atlantikup avannarpasissuani ingerlaqqiffiusumik ilinniarfittut avatangiisilinnut kapitali nutaaq aallartilerpoq.

Ilisimatusarfik aamma Fróðskaparsetur Føroya (Savalimmiuni ilisimatusarfik) anguniagaqarfiulluartumik suleqatigiinnissamik isumaqatigiissuteqaqqammerput, ukiuni tallimani tullinnguuttuni isumaqatigiissutip ilisimatusarfiit taakkua marluk imminnut qaninnerulertissavai.

Isumaqatigiissummi suliassaqarfiit assigiinngitsorpassuit ilaatinneqarput - ataatsimut ilinniakkanik ineriartortitsinissamut ilinniartunillu tapersersuinissamut atatillugu ilaatigut ilinniartitsisunik aamma ilisimatusartunik paarlaasseqatigiinnerit aamma ilanngunneqarsimapput.

Anguniagarlu erseqqarippoq: suleqatigiinnerit imminnut qaninnerussapput angusassamillu toraagaqarnerullutik sumiiffinni taakkunani ilinniakkat qaffasinnerusut pitsaassusaannik kivitsisussat.

"Atlantikup avannarpasissuani unamminartitavut arlalitsigut assigiissuteqarput, akunnitsinnilu annertuumik ilikkagaqarfigisinnaavugut. Tamatuminnga isumaqatigiissuteqarnitsinnik ilinniartitaanerup ilisimatusarnerullu ataatsimut tunngaveqarnerat nukittorsaavigeqqissavarput", Ilisimatusarfimmi rektori, Gitte Adler Reimer, oqarpoq.

Qeqertat taakkua marluk akornanni suliatigut ataqatigiinneq

Isumaqatigiissummi tunngavigineqartut pingaarutillit ilagaat paarlaasseqatigiittarneq.

Tamanna ima isumaqarpoq ilinniartitsisut, ilisimatusartut allaffissornermi ingerlatsinermik suliaqartut maannamiit ilisimatusarfiit akimorlugit sulinissaminnut periarfissaqalerput - assersuutigalugu tikeraatut ilinniartitsiartortutut, ilisimatusaatigalugu ataatsimut suliniuteqarnikkut imaluunniit allaffissornikkut ingerlatsinerup iluani misilittakkanik avitseqatigiinnikkut.

Paarlaasseqatigiittarnerup suliatigut pitsaassuseq nukittorsassavaa, nutaanik isumassarsititsissaaq aamma Kalaallit Nunaata Savalimmiullu akornanni ilisimasat aaqqiissutissallu pitsaasut ingerlaartissallugit.

Ataatsimut ilinniarfiit aamma ph.d.-nngorniartunut periarfissat nutaat

Ilinniakkanik faginillu nutaanik ineriartortitsinissaq ilisimatusarfiit taakkua marluk aamma suleqatigiissutigissavaat, pingaartumik suliassaqarfiit Atlantikup avannarpasissuani inuunermut inuiaqatigiinnullu tunngassuteqartut iluanni.

Tamanna ilinniakkanut nalinginnaasunut aamma digitalikkut aaqqiissutinut aamma atuuppoq, taamaasilluni inuusuttut avinngarusimasuniittut ingerlaqqiffiusumik ilinniagaqarnissaannut ajornanngitsitsinerulerpoq.

Isumaqatigiissummi pingaarnerit ilaattut ilaasoq tassaavoq Savalimmiuni ph.d.-nngorniarfissap ineriartortinneqarnissaa.

Tamatumani Ilisimatusarfik pingaarutilittut atuuffeqassaaq - ilaatigut ataatsimut ilitsersuisarnissamut, fageqartitsinissamut ilisimatusarnermilu sammisassanut tunngatillugu.

Ilinniartut aamma pitsaassutsip aallunneqarnerat

Ilinniartunut neqeroorutit aamma pitsanngorsarneqarnissaat isumaqatigiissummi pingaartinneqarpoq.

Ilinniartunik siunnersuineq atorfittaarnissamullu ikiuinermut aamma tarnikkut peqqissutsimit atugarissaarnermut tunngasut tamaasa ilisimatusarfiit taakkua suleqatigiissutigissavaat.

Tamatuma saniatigut ilinniartitsinerup allaffissornikkullu ingerlatsinerup iluanni pitsaassuseq ataatsimut angusassaqartitsinikkut ingerlaavartumillu nalilersuisarnikkut nukittorsaavigineqassaaq.

Isumaqatigiissut ingerlaannaq atuutilersinneqassaaq ukiullu tallimat atuutissalluni.

Ukiut taakkua ingerlaneranni suleqatigiinneq qanimut malinnaavigineqarlunilu pisariaqartitat apeqqutaatillugit naleqqussarneqartassaaq - tamanna siunissami suleqatigiinnerup sivitsorneqarnissaanik annertusineqarnissaanillu anguniaqarneq aallaavigalugu ingerlanneqassaaq.

Nutaamik isumaqatigiissuteqarnikkut Ilisimatusarfik aamma Fróðskaparsetur Føroya ersarissumik oqariartuuteqarput: ilisimasat killilersuineq ajorput - aamma Atlantikup avannarpasissuani.