Kalaallit Nunaat & Ukraine: Nunat marluk, unammillernartoq ataaseq

Ilisimatusartut allaaserisaanni Ilisimatusarfimmi lektorip Javier Arnautip, ilisimatusartullu suleqatini Volodymyr Byba, Larisa Zhukova aamma Natalia Pinchuk peqatigalugit, Kalaallit Nunaanni Ukrainemilu aatsitassarsiornerit aningaasaqarniarnermut pingaarutilittut qanoq inissisimanerat aalluppaat.

National University Yuri Kondratyuk Poltava Polytechnic-imik Ukrainemiittumik suleqateqarnitsinnut atatillugu 2023-mi upernaakkut Volodymyr Byba Ilisimatusarfimmi tikeraatut ilinniartitsivoq - tamanna pillugu nittartakkatsinni uani atuarnerusinnaavutit.

Allaaserisap killormut sammisutut ittoq, nunat isumalluutissaqarluartut amerlasuut misigisartagaat paasinarsisippaa: Avatangiisit eqqarsaatigalugit aningaasaqarniarneq oqimaaqatigiissumik qanoq ineriartortinneqassava?

Aatsitassarsiorneq siuariartortitsisutut atorlugu

Ukrainep ukiorpaalunngortuni aamaruutissaatini saviminissaatinilu atorluarpai - aatsitassat taakku nunap pisariaqartitaanik sillimmasiisarlutillu avammut nioqquteqarnikkut isertitaqartitsisarput.

Tamanna suliffinnik pilersitsisimallunilu attaveqaatersuutsinik ineriartortitsinermut tapersiisimavoq, kisianni avatangiisinut aamma kinguneqartitsisimavoq.

Kalaallit Nunaat aamma tamatumunnga assingusumik ineriartoqqajaalerpoq.

Nunarput nunap iluaniittunik aatsitassaateqarluarlunilu uuliaqarsinnaavoq, kisianni attaveqaasersuutinik pisariaqartinneqartunik amigaateqarlunilu avatangiisinut tunngasunik eqqarsaatigilluagassaqarpoq.

Avatangiisit, teknologii akisussaaffeqarnerlu

Nunat taakkua marluk ataatsimik unammillernartitaqarput: Aatsitassarsiorneq avatangiisinut pinngitsoorneqarsinnaanngitsunik kinguneqartitsisarpoq.

Taamaammat ilisimatusartut teknologiit nutaat aamma ingerlatsinermut periusissiat pitsaanerusut qanoq ajoqusiinissamut annikillisaataasinnaallutillu piujuartitsinerusumik aatsitassarsiornermik siuarsaasinnaanersut misissorpaat.

Allaaserisami suliamik paasisimasallit Ukrainemeersut nunanit tamalaaneersullu ilisimatusarnerat ilaatigut aallaavigineqarput, taakkua nunarsuaq tamakkerlugu nunamilu ajornartoorfeqarnerit nalaanni pinngortitap isumalluutai qanoq pitsaanerpaamik atorneqassanersut misissoqqissaarsimavaat.

Piviusoq sorsunnertalik & nunatta periarfissai

Misissuinermi immikkut qitiutinneqartoq tassaavoq Ukrainep sorsunnerup nalaani aatsitassarsiornermik suliassaqarfik qanoq isumagineraa - tamannalu aningaasaqarniarnermut inuiaqatigiinnullu qanoq isumaqarnersoq.

Tamanna ilutigalugu allaaserisami ersersinneqarpoq Ukrainep misilittagai Kalaallit Nunaata qanoq ilikkagaqarfigisinnaanerai, minnerunngitsumik aarlerinarsinnaasunut tunngatillugu suliaqarneq aamma ingerlatsinermut assilisassianik kinguneqarluartussanik ineriartortitsineq pineqartillugit.

Piujuartitsineq ataatsimut anguniagaralugu

Ilisimatusartut allaaserisamik suliaqartut tikkuarpaat, naak Kalaallit Nunaat Ukrainelu nunarsuarmi inissisimaffitsigut oqaluttuarisaanikkullu assigiinngilluinnaraluartut assigiinnik arlalinnik apeqqutissaqarput.

Siunissami kinguaariinnut tullernut ajoqutaanngitsumik aningaasarsiornikkut siuariartorneq qanoq qulakkeerneqassava?

Pinngortitaq ajoqusernagu suliffinnik qanoq pilersitsisoqassava?

Siunissami aatsitassarsiornermut politikki pillugu ammasumik akisussaassuseqartumillu oqallinnissamut - aamma nunat taakkua marluk piujuartitsisumik siunissaqarnissaannik qulakkeerinninnissamut nutaanik periusissiortoqarnissaanut - allaaserisaq kajumissaarivoq.

Allaaserisaq uani aasinnaallugulu tamakkerlugu atuarsinnaavat.

Allaaserisaq pillugu paasisaqarnerorusukkuit - lektori Javier Arnaut attavigiinnariaavat.