Kikkut oqaluttuarisaanerput oqaluttuarissallugu pisinnaatitaaffeqarpat?

Qanoq sivisutigisumik oqaluttuarisaanitta allanit oqaluttuarineqartarnera tusaasassavarput?

Nunatta Katersugaasivia pulaaraanni oqaluttuarisaanitsinni nassaarineqarnikut ilisimaneqarnerpaat ilaat takuneqarsinnaapput: timit paniinnarnikut arfineq-pingasut Uummannap qanittuani Qilakitsumeersut.

Taakkua ukiut 500-t sinnerlugit pisoqaassuseqarput - 1972-imilu nassaarineqareernerannit nunarsuaq tamakkerlugu ilisimatusartunit assut soqutigineqarluarsimapput.

Qilakitsormiulli oqaluttuassartaanut apeqqut pingaarutilik puigorneqakkajuppoq: Ullutsinni kalaallit - tusarniaaffigineqaqqaaratik - siuaavisa ilisimatusaatigalugu misissorneqartarnerat, saqqummersinneqartarnerat oqaluuserineqartarnerilu qanoq igaat?

Apeqqut taanna Sara Næss Elleskovip Ilisimatusarfimmi ph.d.-nngorniap ilisimatusaatigalugu suliniutaani uani apeqqutigineqarpoq "Qilakitsormiut - forskning og opfattelse af historiske menneskelevn i Grønland belyst gennem studiet og formidlingen af de mumificerede mennesker fra Qilakitsoq".

Piffissap ingerlanerani timit paniinnarnikut Qilakitsumeersut ilisimaneqarluaqisut ilisimatusarnerni paasissutissiornernilu qanoq atorneqartarsimanersut Sarap ilisimatusaatimini misissorpaa - aammattaaq taakkunatullu pingaaruteqartigisut misissorpai: inuit Uummannami nunattalu sinnerani najugallit tamanna qanoq igineraat.

Ilisimatusarnerni - aamma oqaluttuariaatsini - nunat killermiut isiginnittaasiat suli aallaavigineqartarpoq

Sarap suliniutaa ilisimatusarnermut - aamma silarsuup qanoq paasineqarnissaanut nassuiarneqarnissaanullu kikkut aalajangiisuusarnerannut - aamma isornartorsiuivoq. Naak ullumikkut nunatsinni nammineq ilisimatusarfeqaraluarluta siuariartorfiusumillu ilisimatusartunik avatangiiseqartitsigaluarluta - nunat killermiut ilinniartoqarfii ilisimatusarfiilu sammisassatigut, tassa ilinniartoqarfinni periutsitigut, annertuumik suli aalajangiisuusarput.

Tamanna apeqqutinut apeqqutigineqartunut sunniuteqaannarneq ajorpoq - pingaartumilli aamma apeqqutit qanoq akineqartarnerannut sunniuteqartitsisarpoq.

Taamaammat Sarap nunat killermiut illuinnaasiortumik ilisimatusariaasiat isornartorsiorniarpaa. Taamaammat nunasiaataajunnaarsaasumik Sara suleriuseqarpoq, tamatumanilu kalaallit nunarsuarmik isiginnittaasiat aamma najugaqarfinni nunap inoqqaavisa ilisimasaat pingaarutilittut atuuffeqassapput.

Uummannarmiut nipaat

Suliniutip ilaattut Sara Uummannamukallattaasassaaq - taannalu illoqarfiuvoq Qilakitsumut qaninnersaasoq. Taakani Sarap innuttaasut apersortassavai, Uummannap Katersugaasivia suleqatigisassavaa aamma najugaqarfimmi sammisaqartitsinissanik aaqqissuussisassaaq, tassani najugaqarfimmi innuttaasut siuaatik timaat paniinnarnikut - taakkuninngalu ilisimatusarnerit paasissutissiornerillu - pillugit isummaminnik avitseqatigisinnaaffiannik aggersaasassaaq.

Siunertarineqartoq paasissutissanik aamma nunap inoqqaavisa ilisimasaannik pingaarutilinnik katersinissamut taamaallaat tunngassuteqanngilaq, aammattaarli najugaqarfimmi innuttaasut oqaaseqartissinnaajumallugit oqaloqatigiinnermik pilersitsisoqassaaq - aamma namminneq oqaluttuarisaanerisa qanoq oqaluttuarineqarnissaanut atatillugu.

Toqqorsivimmiit siunissamut

Uummannami sumiiffimmi sulinerup saniatigut toqqorsiviit, ilisimatusaatigalugu nalunaarusiat, katersugaasivinni saqqummersinneqarsimasut tusagassiuutillu oqaluttuarisaanermut tunngasut Sarap aamma misissussavai. Timit paniinnarnikut Qilakitsumeersut piffissap ingerlanerani ilisimatusarnerni paasissutissiornernilu qanoq atorneqartarsimanersut taassuma misissussavai - tamatumalu inuit kulturiat pillugu isiginnittaasitsinnik qanoq ersersitsinera.

Suliniutip naammassiartuaarnerani Sarap kalaallit ilisimatusartut aamma suliaqartut Nunatta Katersugaasiviani workshoppertitsinissamut aggersassavai, tassani inuit timaasa sinnikui saaniilu itsarnisat, ilisimatusaatit aamma nunap inoqqaavisa ilitsoqqussaat ilisimasaallu ataqqillugit, maannamiit qanoq suliarineqartassanersut pillugit eqqartueqatigiissapput.

Aammattaaq Sarap taamaasilluni neriuutigaa suliniut nunatsinni - itsarnisat, nalerput aamma taakkua marluk nassuiaasersornissaannut kikkut pissaaneqarnersut pillugit - siammasinnerusumik oqallinnermik tamanna aallarneeqataajumaartoq.