Nunarsuaq tamakkerlugu ajornartoortoqarnerani Kalaallit Nunaata inissisimaffia

Issittoq ajornartoornernit eqqorneqaraangat Kalaallit Nunaat qanoq qisuariartarpa?

Apeqqut taanna Ilisimatusarfimmi lektorip Rasmus Leander Nielsenip ilisimatusartut allaaserisaanni nutaami misissorpaa, allaaserisaq taanna atuagassiami Internasjonal Politikk-imi saqqummersinneqaqqammerpoq.

Allaaserisami - ima qulequtserneqarsimasumi "Krisediplomati i Arktisk Råd: en komparativ analyse af Grønlands håndtering af henholdsvis covid-19 og Ruslands invasion af Ukraine" - piffissami kingusinnerusumi nunarsuaq tamakkerlugu ajornartoornerit marluk annersaat pulaffigineqarlutillu tamatuma nunatta nunanut allanut tunngasunik naalakkersuinikkut attaveqarneranut qanoq sunniuteqarsimanersoq qimerloorneqarpoq.

Ajornartoornerit marluk - susassaqarfik ataaseq

Ukiuni arlalinngortuni Issittumi Siunnersuisoqatigiit ingerlassaqartuupput - siunnersuisoqatigiit taakkua tassaapput Issittumi suleqatigiinnerit iluanni oqalliffiit pingaarnersaat.

Kisianni 2020-mi nunarsuaq tamakkerlugu corona tuniluutilermat, 2022-milu Ruslandip Ukraine saassummagu, siunnersuisoqatigiinni suleqatigiinneq ilungersunartorsiungaatsialerpoq.

Inissisimaffimmi taama ittumi Kalaallit Nunaat qanoq iliuuseqarpa?

Nunarsuaq tamakkerlugu tupannartumik pisoqarneranit Issittumi Siunnersuisoqatigiit ulluinnaat akornuserneqarmat tamanna qanoq isumaqarpa?

Apeqqutit taakkua allaaserisami akiumaneqartut ilagaat.

Allaaserisami ersersinneqarpoq Kalaallit Nunaata nunanut allanut tunngasutigut susassaqarfia qanoq unammillerneqarsimanersoq - aammattaarli qanoq naleqqussarneqarsimanersoq - tassa ajornartoornerit taakkua marluk akornanni.

Kalaallit ingerlassaqartut qitiutinneqartut

Ilisimatusarnermik suliaqarneq kalaallinik sinniisutut aallartitanik apersuinernik aamma pisortatigoortunik allakkianik misissueqqissaarinernik tunngaveqarpoq.

Tassani ingammik Nunanut Allanut Naalakkersuisoqarfiup piffissani ajornartoorfiusuni pitsaanngitsuni taakkunani marlunni qanoq sulisimanera ersersinneqarpoq.

Tamanna ilutigalugu allaaserisaq Kalaallit Nunaata pisunik taakkuninnga marlunnik qanoq isuginnissimaneranik sanilliussivoq - aamma assigiinngissutsit ersarissut ajornarnartoornermilu naalakkersuinikkut kalaallit nunanut allanut attaveqariaasianni assigiissutsit pingaarutillit tikkuarneqarput.

Nunanut allanut attaveqartarneq ilungersunartorsiortoq

"Kalaallit Nunaata Issittumi Siunnersuisoqatigiinnik suleqateqarnini pingaarnerpaatippaa, taamaammat ajornartoornerit oqallittarfinnik quarsaarutigineqaraangata nunanut allanut tunngasunik naalakkersuinikkut suliaqarneq toqqaannartumik sunniivigineqartarpoq", Rasmus Leander Nielsen nassuiaavoq.

Ingerlassallit minnerusut, soorlu Kalaallit Nunaat, nunat tamalaat akornanni akerleriinnernik avatangiiseqartumi nunatta allanut attaveqarnerminik qanoq ingerlassaqarsinnaaneranut tunngatillugu Rasmus Leander Nielsen allaaserisaminik tapersiivoq - tamannalu siunissaq eqqarsaatigalugu ilikkagaqarfigisinnaavarput.