UArctic-ip Kalaallit Nunaannut, Savalimmiunut Danmarkimullu aningaasaataanik ataqatigiissaarinera Ilisimatusarfiup akisussaaffigilerpaa

Kalaallit Nunaanni, Savalimmiuni Danmarkimilu UArctic-imit aningaasanik agguaassisoqaraangat maannamiit Ilisimatusarfik taakkuninnga nassiussisuusassaaq.

Tamanna pivoq Finlandimi UArctic International-ip allattoqarfia akisussaasuujunnaarmat Ilisimatusarfillu tamatuminnga atuuffeqalermat.

"UArctic-ip aningaasaliiffigisartagaanut pingaarutilinnik siunertaqartunut tapiisarnerup ingerlateqqinnissaa qilanaaraarput," Gitte Adler Reimer, Ilisimatusarfimmi rektoriusoq, taama oqarpoq.

UArctic-ip aningaasaatai Kalaallit Nunaannut, Savalimmiunut Danmarkimullu agguaanneqartartut Danmarkimi ilinniartitaanermut ilisimatusarnermullu aqutsisoqarfimmeersuupput (Uddannelses- og Forskningsstyrelsen).

Suliniutinut arfinilinnut 3 millionit

Ilisimatusarfiup aningaasaatinik ataqatigiissaarisunngornera ilutigalugu Uddannelses- og Forskningsstyrelsen-imit aningaasat atorneqartussatut akuerisat annertussusaat marloriaatinngortinneqarput, taamaasilluni 2025-mi aningaasaatigineqartut 3 millionit koruuninngorput.

Tamanna ima isumaqarpoq, ukioq manna suliniutit assigiinngitsut arfinillit aningaasaliiffigineqarsinnaanngussapput suliniutillu tamarmik immikkut 500.000 koruunit tikillugit tapiiffigineqarsinnaassallutik.

Siunertarineqartoq tassaavoq suliniutit, ilaatigut Issittoq pillugu peqataatitsisumik ataqqinnittumillu, aamma tamanna ilutigalugu suliniutit Issittoq tamaat iluani suleqatigiittoqarnissaanik piumasaqartut tapiiffigineqarnissaat.

"Ilisimatusarnerit inuiaqatitsinnut iluaqutaasussat pingaaruteqarluinnarput - tamatumunngalu atatillugu UArctic aqqutigalugu suliniutinut tapersiineq pingaaruteqartuuvoq. Taakkununnga tapersiisarnernik ingerlassinissatsinnut qilanaarpugut", Gitte Adler Reimer oqarpoq.

UArctic-ip nuttarsinnaanermut suliniutaa north2north 2025-mi juunimiit Ilisimatusarfiup aammattaaq suliniutigilissavaa, suliniut taanna ilinniartut aamma ilisimatusartut ilinniarnerannut sulinerannullu atatillugu nunarsuarmi angalasinnaanissaanut periarfissiisarpoq.

Paasissutissat

UArctic tassaavoq nunani avannarlerni ilinniartitaanerup ilisimatusarnerullu iluanni suliaqartut suliassaqarfiillu taakkua pillugit suliaqartut ilisimatusarfiit, ilinniarfiit qaffasinnerusut, ilisimatuutut misissuiviit ilinniarfiillu allat attaveqarfiat.

UArctic ataatsimut piginnaasanik attaveqaasersuutinillu ineriartortitsisuuvoq, tamannalu ilaasortat ilinniartoqarfiusut soqutigisaannut suliassaqarfiinullu tunngatillugu iluaqutaanerusinnaapput.

Danmarkimi Uddannelses- og Forskningsstyrelsen qallunaat aningaasaqarnermut inatsisaat aqqutigalugu UArctic-imut tapersiisarput, 2025-milu aningaasat atorneqartussatut akuerisat 1,5-init 3 millionit koruuninut qaffanneqarput.

UArcticimi siulittaasut, tassaasut ilisimatusarnerup silarsuaani qaffasissumik piginnaasallit suliassaqarfinnit assigiinngitsorpassuarneersut, nalilersuinerat tunngavigalugu aningaasat ilisimatusaatigalugu suliniutinut Kalaallit Nunaanneersunut, Savalimmiuneersunut Danmarkimeersunullu agguaanneqartarput.