Kapitali naasoq: Gitte Adler Reimer Ilisimatusarfimmi rektoriusimanerminut qujassuteqartoq

Ukiuni arfineq-pingasuni Ilisimatusarfimmi, pinngitsoorneqarsinnaanngitsut ilaattut, rektorioreerluni Gitte Adler Reimer novembarip 30-ani 2025 pisortatigoortumik naggammik sulissaaq - novembarillu 28-ani campus Ilimmarfimmi naggataarnersiortitsineq Ilisimatusarfiup ilasseqatigiinnikkut malunnartissavaa.

Ilinniartuusinnarluni rektorinngortoq

Gitte Adler Reimerip Ilisimatusarfimmut atatillugu oqaluttuassartaa ilinniartitaanermut, ilisimatusarnermut peqatigiinnermullu ukiorpassuarni imminut tunniusimaneranut tunngavoq. Gitte Ilisimatusarfimmeeqqaalerami ilinniartuusimavoq - tassanngaanniillu Ilisimatusarfiup atuuffiini tamangajanni malunnaateqartarsimavoq.

2011-mi Gittep ph.d.-nngorniassutini "Slægtskab og køn i grønlandske bysamfund - følelser af forbundethed" illersorpaa, ph.d.-nngorniutigalugu suliniut taanna nalitsinni kalaallit inuiaqatigiit ilusaannik paasinnittaatsimut pingaarutilittut ulloq manna tikillugu suli tapersiisarpoq.

Tamatuma kingorna ilinniakkap Inuiaat Kulturiat Oqaluttuarisaaneranullu immikkoortortaqarfiani pisortanngorpoq, 2015-imilu februaarip aallaqqaataaniit Kulturimik, Oqaatsinik Oqaluttuarisaanermillu Ilisimatusarfimmi pisortanngorluni.

Gitte decembarip sisamaani 2017 pisortatigoortumik Ilisimatusarfimmi rektorinngortinneqarpoq - arnanilu aappaattut rektoriulluni.

Rektori ilinniartunut uummateqarfiginningaartoq

Rektoritut Gitte Adler Reimer ukiuni arfineq-pingasuni ineriartortitsinerit suleqatigiinnerillu siuttuuffigisimavai - ilinniartullu pillugit suliniuteqartartutut nukittuumik suliniuteqarsimavoq. Ilinniartut ilisimatusarfiup uummatigigai Gittep erseqqissaatigiuartarsimavaa - tunniusimaneralu ilinniarnermut politikkimit ulluinnarni atugarissaarnissamut tamanut tunngasuni sunniuteqarnera ersarittarsimavoq.

Aamma isertugaanngilaq Gittep ilisimatusarfiup nunanit tamalaanit tikeraatut ilinniartuinut suliassaqarfik aamma nuannarilluinnaraa. Nunanit tamalaanit tikeraatut ilinniartunut tunngatillugu oqaloqatigiinnerni ilaasarsimavoq - aamma tikeraatut ilinniartut ileqquusumik campusimi Nunanit tamalaaneersut kaffisoriartoqqusigaangata - nerisassaataannik ussiiartortarpoq.

Ilisimatusarfik allanngoriartortoq

Gitte Adler Reimerip aqutsinerani Ilisimatusarfiup Kalaallit Nunaanni ilisimasatigut qitiusutut inissisimanera aamma nukittorsarneqarsimavoq - ilisimatusarfillu najugalinnit nunallu tamalaaneersunit aamma sammivilerneqarsimavoq.

Nunatsinneersut allamiullu ilisimatusarnikkut avatangiisaanni suleqatigiinnernik Gitte ineriartortitseqataasimavoq - aamma ilinniartut sulisullu pitsaanerusunik sinaakkuteqarnissaat pillugu qasuttuilluni sulisimavoq.

Suliniutit pingaarutillit Gittep aallartissimasai ilaat tassaavoq campus Ilimmarfimmik alliliinissamut suliniuteqarneq.

Ilinniartut aallartittartut amerliartorneri aamma ingerlassat annertusiartorneri eqqarsaatigalugit Ilisimatusarfiup siunissami illuutitigut pitsaanerusumik sinaakkuteqartitsinissaanut suliniarnermi Gitte qitiusumik inissisimaffeqarsimavoq.

Suliaq tamanna rektorertaassamit nanginneqarumaarpoq - alloriaatilli pingaarutillit siulliit Gittep aqutsineraneersuupput.

Kapitali naasoq

Gitte Adler Reimerip rektoritut allaffini tullinnguuttumut tunniuppagu ilisimatusarfik nukittuumik inissisimasoq qimassavaa - kingornussassaq tamanna suliamut piginnaasaqarnermit, kialaarnermit tunniusimanermillu ilusilersorneqarsimavoq.

"Ilisimatusarfik inuuninni ilaajuarnikuuvoq - ilaajuassaarlu”, Gitte oqarpoq. "Inuit pikkorissorpassuit imminnullu tunniusimasut suleqatigisinnaasimagakkit - aamma ilinniartut ineriartornerat siunissamillu pilersitseqataanerat takusinnaasimagakku - nuannaarutigeqaara".

Novembarip 28-ani 2025 Gitte Adler Reimer nalliuttorsiutigalugu qutsavigalugulu naggataarnersiortitsinermut ullumikkut sulisut, suleqataasut ilinniartullu aamma sulisuusimasut, suleqataasuusimasut ilinniartuusimasullu tamaasa Ilisimatusarfiup qaaqquai.

Gitte novembarimi feeriarpoq - rektorimillu atorfinitsitsivittoqarnissaata tungaanut Mari Kleist rektoriugallassaaq.