Mari Kleist Ilisimatusarfimmi rektorissatut toqqarneqarpoq

Ilisimatusarfimmi siulersuisut Mari Kleist ilisimatusarfiup rektorissaatut toqqarpaat - decembarillu aallaqqaataani 2025 pisortatigoortumik atorfinitsinneqassaaq.

Mari Kleistip Gitte Adler Reimer, ukiorpassuarni rektorioreerluni naggataarnersiulersoq, kingoraarpaa.

"Mari Kleist Ilisimatusarfimmi rektorertaatut tikilluaqqusinnaagatsigu nuannaarutigingaarparput. Taanna aqutsisutut nukittuujullunilu aallarnisaanermut takorluuisinnaasuuvoq, ilisimatusarfiullu aamma tamatuma inuiaqatigiinni pingaaruteqassusaa ilisimalluarpai. Marip Ilisimatusarfimmi rektorinngortinneqarnermini suliatigut pingaarnerit aamma aaqqissugaanermik paasisimasaqarluarnini aqutsinermini ataqatigiitsissavai", Ilisimatusarfimmi siulersuisuni siulittaasoq, Eyjólfur Guðmundsson, taama oqarpoq.

Mari Kleist 2025-mi februaarip aallaqqaataaniilli Ilisimatusarfimmi prorektoriusimavoq - tamatumalu siorna Kulturimik, Oqaatsinik Oqaluttuarisaanermillu Ilisimatusarfimmi pisortaasimalluni. Mari taamaasilluni ukiuni kingullerni Ilisimatusarfimmik aqutsinermi ineriartortitsinermilu qitiusumik atuuffeqarsimavoq.

Ilisimatusarnermik aqutsinermillu ukiorpassuarni misilittagaqarluni Mari Kleist rektoritut atorfininnermini ilisimatusarnerup silarsuaani aamma periusissiornermut tunngasutigut nukittuffigisani nassassavai. Suliassaqarfiit assigiinngitsut suleqatigiinnerisa nukittorsarneqarnissaat kiisalu Ilisimatusarfiup inuiaqatittalu ataqatigiinnerulernissaat Marip pingaarnertut ukkatarisimavai.

"Tulluusimaarpunga aamma siulersuisut tatiginninnermik takutitsinerat qujamasuutigaara. Ilisimatusarfik inuiaqatitsinni pingaaruteqarluinnartutut atuuffeqarpoq - suleqatit aamma ilinniartut peqatigalugit Ilisimatusarfiup nukittuuginnarnissaanut ammasuunissaanullu suliap nanginnissaa qilanaaraara", Mari Kleist oqarpoq.

Gitte Adler Reimerip ukiuni arlalinni Ilisimatusarfiup ineriartortinneqarneranut annertuumik sulissuteqarsimaneranut pingaarutilimmillu tapiissuteqarsimaneranut siulersuisut aamma qutsavigaat.

Mari Kleistip rektoritut toqqarneqarnerani Ilisimatusarfiup pilluaqqungaarpaa - taassumalu aqutsisunngorneratigut suleqatigeqqinnissaa qilanaaralugu.

Paasisaqarnerorusukkuit qinnuigaatsigit attavigeqqullugu:

Eyjólfur Guðmundsson

Ilisimatusarfimmi siulersuisuni siulittaasoq

E-mail: eyjolfurg@lbhi.is