Ilikkarsarnermi pikialaartitsineq: silaqassutsikkut pilersitanik ilisimatusaatinik ilinniartitsineq qitiutillugu

Oktobarip 16-iani 17-ianilu 2025 Ilikkarsarnermi pikialaartitsineq 2025 ingerlanneqarmat Ilisimatusarfimmi peqataasoqaqalunilu isumassarsiat avitseqatigiissutigineqarput aammattaaq suliatigut itisilerisoqarpoq.

Ilinniartitaanermut Aqutsisoqarfiup Ilinniartitsinermillu Ilisimatusarfiup suleqatigiinnermikkut pikialaartitsineq aaqqissuussimavaat - ukioq mannalu silaqassutsikkut pilersitanik ilisimatusaatinut fagit qitiutinneqarput: oqaluttuarisaaneq, inuiaqatigiilerineq, upperisarsiorneq, filosofi aamma inuttut ineriartorneq.

Ilikkarsarnermi pikialaartitsinermut siunertaq ersarippoq: silaqassutsikkut pilersitanik ilisimatusaatinut fagini ilinniartitsisut ulluinnarni atuartitsisarnerminnut nutaanik isumassarsitinneqarnissaat atortussarsitinneqarnissaallu.

Ulluni marlunni assigiinngitsunik saqqummiisoqarnerani, workshoppertitsinerni aamma sulianut tunngasunik oqaloqatigiinnerni, tassa inuiaqatigiit ineriartorneranit UNESCO-mi kulturikkut kingornussanit, digitalikkut killissanut toqqissisimanissamullu, tarnikkut peqqissuunissamut, meeqqat pisinnaatitaaffiinut, aningaasaqarnermut aamma inuiaqatigiinnut, oqaluttuarisaanermi fagimi atuarnikkut paasinnittaatsimut aamma pimmatiginnittoqannginnissaanut periusissanut tunngasuni, ilinniartitsisut peqataapput.

Sammisat pilersitsisinnaanermut teknologiimullu tunnganerusut pilersaarummi aamma ilaatinneqarsimapput - ass. "Silassorissuusiaq atorlugu oqaluttuarisaanermi malunniuteqarsimasut oqaloqatigikkit" aamma "Sumiiffiga - kulturi kinaassuserlu pillugit digitalikkut oqaluttuat".

Saqqummiinerit tamarmik anguniagaraat: ilinniartitsisut suliatigut atortussaasa nukittorsarneqarnissaat aamma atuartitsinermut nukissanik nutaanik tunniussisoqarnissaa.

Ilikkarsarnermi pikialaartitsineq 2025-p ingerlanneqarnerani silaqassutsikkut pilersitanik ilisimatusaatinut fagini qanoq tunniusimasoqartiginera nutaaliorusuttoqartigineralu - aamma atuartut oqaluttuarisaanermik, kulturimik imminnullu paasinnittaaseqarnerinut qanoq isumaqartiginersut - paasinarsipput.

Pikialaartitsineq isumassarsiorfigalugulu ullormut pilersaarutaasimasut Ilinniartitaanermut Aqutsisoqarfiup nittartagaatigut aasinnaavatit.