Inuerukkiartorneq pinngortitarlu pillugit nunat tamalaat ilisimatusaqatigiillutik suliniutaanni Ilisimatusarfik suleqataasoq

Nunat tamalaat ilisimatusaqatigiillutik suliniutaanni REVIVE: Restoring Ecosystems in the Face of Depopulation Via Innovation & Entrepreneurship-imi Ilisimatusarfik suleqataavoq - inuerukkiartorneq pinngortitamut najugaqarfinnilu inuiaqatigiinnut qanoq sunniuteqartarnersoq, aamma piujuartitsisunik nutaaliornerit avinngarusimasuni inuunermik nutaamik qanoq pilersitsisinnaanersut suliniummi misissorneqassapput.

Suliniut 1,9 mio. koruuninik aningaasaliiffigineqarsimavoq, suliniutillu ilaa EU-llu Erasmus+ programmianit aamma aningaasaliiffigineqarsimavoq.

Suliniut Ilisimatusarfimmi lektorimit Javier Arnautimit aqunneqassaaq, Europamilu - Finlandimit Spaniamut Italiamullu, Bulgariami Litauenimilu - ilisimatusartut, aallarniisartut aamma najugaqarfinni inuiaqatigiit suliniummi ataatsimoortinneqassapput.

Nunarsuaq tamakkerlugu nunani avinngarusimasumiittut assigiimmik unammillernartitaqarput: illoqarfiit alliartortillugit avinngarusimasut inuerukkiartorput, pinngortitarlu allanngoriartorpoq.

Inuit allamut nuukkaangata nunaannaat allanngoriartortarput - aamma uumassusillit ataqatigiiaarnerat, nalinginnaasumik uatsinnut inuussutissaqartitsisartoq, nukissanik, imissamik kulturinilu naleqartitanik tunniussaqartartoq, oqimaaqatigiikkunnaartarpoq.

Taamaammat suliniummi REVIVE-mi allanngoriartornerit taakkua paasineqarnissaannut isumagineqarnissaannullu atortussat aamma periusissat nutaat ineriartortinneqassapput.

Workshoppertitsinikkut, najugaqarfinni sulissuteqarnikkut digitalikkullu ilisimasanik siammarterinikkut suliniutip najugaqarfinni piginnaasat ineriartortillugillu suliffeqarfiit piujuartitsisuunissaannut isumassarsitissavai, pinngortitamut inuiaqatigiinnullu iluaqutaasussamik.

Tamanna ilutigalugu ilisimatusaqatigiit ataatsimut systemiliussapput, systemi taanna innuttaasuni allannguutit uumassusillit ataqatigiiaarnerannut, aningaasaqarnernut najugaqarfinnilu inuiaqatigiinnut qanoq sunniuteqarnerinik nakkutilliissaaq - nunallu suleqatigiit misilittakkaminnik aaqqiissutissiaminnillu tassuuna avitseqatigiissinnaanngussapput.

Sumiiffinni inuerukkiartortuni piujuartitsinerusumik siunissamik qulakkeerinninnissaq eqqarsaatigalugu ilisimasanik nutaanik, ilisimatusartunit, aalajangiisartunit najugaqarfinnilu inuiaqatigiinnit atorneqarsinnaasunik, pilersitsisoqarnissaa siunertarineqarpoq.

Ilisimatusaqatigiit suliniutaat pillugu nittartakkatsinni atuarnerusinnaavutit.