Pinerluttuliortarnerit eqqartuussutillu pillugit inuttaasut isumaat

Eqqartuussiveqarnermi suliat eqqartuussutigineqarsimanerinut innuttaasut isumaat pillugit misissuineq ataasinngormat Naalakkersuisut saqqummersippaat.

Misissuineq Ilisimatusarfimmi professorimit Anette Storgaardimit aamma ilisimatusarfimmi inatsisilerinermik ilinniartunit pikkorissunit suliarineqarsimasoq, innuttaasunik ataatsimiisitsinernik, internetikkut apersuinermi immersugassaq atorlugu misissuinermik aamma isummersoqatigiissitanik apersuinermik tunngaveqarpoq.

Hashimik anngiortumik eqqussineq, nakuuserneq, pinngitsaaliilluni atoqateqarneq, meeqqanik innarliineq, toqutseriarneq aamma mianersuaalliorluni toqutsineq pillugit suliat tigussaasut misissuinermi peqataasunut saqqummiunneqarsimapput.

Ilisimasat tamanit pissarsiarineqarsinnaanngorsimasut - aamma qanoq eqqartuussisoqarnissaanut naatsorsuutigineqartut - tunngavigalugit eqqartuussutit qanoq siumut eqqoriaruminaatsiginersut nalunaarusiami ersersinneqarpoq.

Anette Storgaard naapertorlugu eqqartuussiveqarnermi suleriaatsit, pinerluttuliornermut eqqartuussutit - aamma ineriartornerup ingerlaarnerata sumut sammiveqartariaqarnissaa - pillugit siunissami oqallinnernut nalunaarusiaq patajaatsumik tunngaviliisinnaavoq.