Ilisimatusarfimmi Ukiumoortumik nalliuttorsiorneq: Ataqqinaatitut doktorinngortinneqartut 2-k & ph.d.-nngortut 3-t

Ilisimatusarfik ullumi tallimanngornermi Ukiumoortumik nalliuttorsiorpoq - ulloq inuiaqatitsinni atuuffitsinnik nalliuttorsiorfiusoq.

Nalliuttorsiornermi oqalugiartoqarpoq, nipilersortoqarpoq, persuarsiorpalaartumillu katerisimaartoqarluni - ukioq mannalu ataqqinaatitut doktorinngortitsinermi aamma ph.d.-nngortitsinerni gradit agguaanneqarneri pingaarnertut qitiutinneqarput.

Ataqqinaatitut doktorinngortinneqartut 2-k

Ilisimatusarfiup ataqqinaatissatut taaguut tunniuttagaa pingaarnerpaaq, ataqqinaatitut doktorinngortinneqarnermi gradi, ukioq manna ukununnga tunniunneqarpoq:

Klaus Nygaard - Pinngortitaleriffimmi pisortaasimasoq

Kalaallit Nunaanni ilisimatusarnerup avatangiisaanik ineriartortitsinermi Klaus Nygaard ukiuni qulikkuutaani arlalinni qitiusumik atuuffeqarsimavoq. Kalaallit Nunaanni Aalisakkanik misissuisarnerup nunatsinnut nuunneqarnissaa 1990-ikkunni aammattaaq Nuummi Pinngortitaleriffimmik pilersitsisoqarnissaa sulissutigisimavai, Pinngortitaleriffillu ullumikkut tassaavoq nunatsinni nunanilu tamalaani ilisimatusarnernik sullissivittut akuerisaasoq.

Nunanitsinni ilisimatusarnerup aaqqissugaanerata ineriartortinneqarnerani Klaus Nygaard aallarnisaanissanut takorluuisuusimavoq.

Umiarsuup ilisimatusaatip nutarsarneqarnerani aamma ilisimatuutut misissuivinnik pilersitsinermi pingaarutilittut atuuffeqarsimavoq.

Pingaarutilittullu tapersiissutigisimasaasa ilaat tassaavoq Ilinniakkanik nutaanik pilersitsisoqarnissaanut suliniuteqarsimanera. SILA-mi uumassusilerinermi ilinniakkamik pilersitsinermi pingaarutilittut atuuffeqarsimavoq, bacheloritut ilinniagaq taanna nunatta inuusuttaanut Issittumi uumassusilerinermi suliatigut qajannaatsumik toqqammaviliisuuvoq taamaasillunilu ilinniagaq ilisimatusarnernut ilisimatuutullu ilinniagaqarnissamut aqqutissiuisuulluni.

Klaus Nygaardip suliniutai ilisimatusarnernut, ilinniartitaanermut aamma Kalaallit Nunaanni uumassusillit pissamaatigineqartunik aqutsinermut ulloq manna tikillugu sunniuteqaqataasimapput.

Mariane Petersen (toqoreernerata kingorna) - taalliortoq, nutserisoq aamma Nunatta Katersugaasiviani pisortaasimasoq

Mariane Petersen ukiorpassuarni sulinermini nunatsinni kulturitsinnut ilisimatusarnermilu ineriartortitsinermut asseqanngitsumik taperseeqataasimavoq. 1982-imit 2004-mut Nunatta Katersugaasiviani pisortaanermini malunnaatilimmik itsarnisarsiuujusimavoq, pingaarutilinnik nassaartitseqataasimavoq nunatsinnilu kulturikkut kingornussatsinnik tammatsaalisaaneq nukittorsarsimavaa.

Issittumi itsarnisarsiornerup suliassaqarfiani oqaatsinik siullerpaamik allattuiffiliorsimavoq aamma Grønlands Forhistorie kalaallisuunngorlugu nutsersimavaa - suliniutigisimasai kinguaariinnut tullernut ilisimatusartuusunut aamma katersugaasivinni immikkut ilisimasalinnut aqqutissiuisuupput. Ilisimatusarnermi nalaani aammattaaq ilisimatusaatitut allaaserinnissimavoq, ilaatigut arnat kalaallit kulturikkut nipaat aamma 1900-kkunni kalaallisuuliat pillugit.

Atuakkiortutut nutserisutullu Mariane kalaallit atuakkiaanni oqaasiinilu sunniuteqangaatsiarsimavoq, ilaatigut Piniartorsuit kinguaavi-nik qulequtserlugu taallianik katersanik saqqummersitsinikkut, taannalu Nunat Avannaamioqatigiit Siunnersuisooqatigiivisa atuakkiortumut nersornaasiuttagaanut innersuunneqarsimavoq.

Mariane Petersen oqaluttuarisaaneq kisiat aallussarisimanngilaa, aammattaarli nalitsinni inuiaqatigiit pillugit suliaqartarsimavoq, ilaatigut Nuummi kommunalbestyrelsemi ilaasortaanermi nalaani. Mariane ilisimatusarnerup atuakkiornerullu silarsuaanni attaviliisuusarsimavoq, suliaalu nunatsinni kulturikkut nunattalu anersaavani malunnaateqartuassapput.

Klaus Nygaard aamma Mariane Petersen tamarmik immikkut inuunerminni ukiorpassuarni sulinermikkut nunatsinnut pingaaruteqarluinnartumik tunniussaqarsimapput - angusimasaat maanna Ilisimatusarfiup pingaarnertut nersornaasiuttagaanik ataqqinaaserneqarput.

Ph.d.-nngortut 3-t

Ilisimatusarfimmi ph.d.-nngorsimasut maanna pingasunik nutaanik aamma ilaneqarput:

• Aviaq Fleischer - ph.d.-tut allaatigisaminik "Arkivskatte - kulturarv fra Grønland og om Grønland. Arktis: medier, arkiver, formidlinger"

• Parnuna Egede Dahl - ph.d.-tut allaatigisaminik "Utilization of Indigenous knowledge in environmental impact assessment of resource development projects in Greenland and the Canadian Arctic"

• Sara Olsvig - ph.d.-tut allaatigisaminik "Win the hearts and minds - Superpower influence on national self-determination - How relations between Greenland and the United States affect Greenland’s selfdetermination in times of increased international focus and tension in the Arctic"

Aviap, Parnunap aamma Sarap ph.d.-nngorniutaat pingaaruteqarluinnartunik ilisimasanik nutaanik tapersiipput, Ilisimatusarfiullu nunatsinni nunarpullu pillugu ilisimatusarnermi qitiusumik inissisimaffeqarnera aammattaaq ersersippaat.

Ullormi nalliuttorsiorfiusumi oqaatsit isumaqarluinnartut atorneqarput, qulleq ikinneqarpoq qilaatersortoqarlunilu

Rektorip Gitte Adler Reimerip Ukiumoortumik nalliuttorsiorneq tikilluaqqussutitut oqalugiarnermigut ammarpaa, kingornalu prorektori Mari Kleist aamma Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Nivi Olsen, ukiumoortumik nalliuttorsiornermut atatillugu aamma oqalugiarput.

Tamarmik pingasuullutik Ilisimatusarfiup - oqaluttuarisaanitsinni, nalitsinnullu siunissamuttaaq atatillugu - inuiaqatigiinnut pingaaruteqassusaa oqaasertalerpaat.

Nalliuttorsiornermi nipilersortut tassaapput Maaliannguaq Petrussen aamma Jaaku Sørensen - Karen Kuka Fleischerilu ilisarnaatitut qullermik ikitsisuuvoq qilaatersorlunilu naggasiilluni.

Katerisimaareernerup kingorna nalliuttorsiorneq ilasseqatigiinnermi nanginneqarpoq.

Ilisimatusarfiup angusimasai tamarmik 2025-mi Ukiumoortumik nalliuttorsiornermi persuarsiutigineqarput - siunissamilu suliassat periarfissallu suusinnaaneri tamatumani takorlooruminarsipput.

Assiliisoq: Emil Stach