Nunatta Danmarkillu akornanni oqaluttuarisaanermi pisimasut pillugit ilisimatusaatigalugu suliaq maanna aallartinneqarpoq

Septembarip 1-ani 2025 oqaluttuarisaanermi pisimasut pillugit ilisimatusaatigalugu suliaq annertooq pisortatigoortumik aallartinneqarpoq: Sorsunnersuup aappaanilli ullumikkumut Kalaallit Nunaata Danmarkillu akornanni pissutsit qulaajarneqassapput.

Suliniut juunip 9-ani 2022 Naalakkersuisut danskillu naalakkersuisuisa ataatsimoortumik nalunaaruteqarnermikkut isumaqatigiissutaannit aallaaveqarpoq, nalunaarummi tassani aalajangerneqarpoq arlaannaanulluunniit attuumassuteqanngitsumik, ilisimatusarnermik tunngaveqartumik qulaajaasoqassasoq.

Qulaajaanermi siunertarineqartoq tassaavoq aalajangiinerit, iliuutsit allanngoriartortitsinerillu ukiuni qulikkuutaani kingullerni Kalaallit Nunaata ineriartorneranik aamma nunatta Danmarkillu akornanni pissutsinik ilusilersuisimasut paasinissaannut suliatigut patajaatsumik tunngaveqartoqarnissaa. Tamanna ilutigalugu pisimasut pillugit ataatsimut paasinnilluartoqarnissaa aamma saammaasseqatigiinnissamut tunngavissiisoqarnissaa aammattaaq anguniarneqarput.

Politikkikkut aalajangiinerit, pisimasut ingerlanneqarsimasullu pingaarutillit Kalaallit Nunaannut nunallu innuttaasuinut kinguneqartitsisimasut qulaajaanermi erseqqissarneqassapput.

Ilisimatusaatigalugu suliap aallartinneqarnissanut piareersaataasumik suliaqarneq sivisooq pisariaqartinneqarsimavoq, tamatumani aaqqissuussisoqarsimallunilu piareersartoqarsimavoq, tamannalu aamma ima isumaqarsimavoq ilisimatusaatigalugu suliaq aatsaat maanna aallartinneqarsinnaanngortoq. Suliniut ilisimatusartunit, immikkut ilisimasalinnit aamma oqaluttuarisaanermik ilisimatuunit nunatsinneersunit Danmarkimeersunillu ukiuni arlalinni peqataaffigineqarluni tunngavilerneqarsimasoq maanna aallartinneqarsinnaanngorpoq.

Ilisimatusartoqatigiit aqutsisui Tenna Jensen aamma Daniel Thorleifsen sulinissaminnut assut qilanaarput:

"Piffissaq Kalaallit Nunaannut Danmarkimullu isumaqarsimaqisoq pillugu ilisimasanik nutaanik pilersitsinissaq pingaaruteqarlunilu tamatumunnga akisussaaffik annertuvoq. Maniguulluta suliatigullu peqqissaarussilluta suliassaq aallutissavarput - neriuutigaarpullu paaseqatigiinnissamut aamma assigiinngisitaarnerusumik oqaluttuarisaanermik pilersitsisoqarnissaanut sulinerput tapersiiumaartoq", taakku oqarput.

Qulaajaanikkut kapitali nutaaq maanna aallarnerneqarpoq: Suliaq ilisimasanik, paasisimasaqassutsimik paasinninnernillu nutaanik pilersitsisussaq - aamma oqaluttuarisaanerput akunnitsinni ataqatigiissoq pillugu ammasumik peqatigiittumillu oqaloqatigiinnissamut tunngavissiisussaq.

Ilisimatusartoqatigiit aqutsisui Naalakkersuisut danskillu naalakkersuisui peqatigiinnerisigut toqqarneqarsimapput - taakkualu aaqqissugaanikkut Ilisimatusarfimmut atapput.

Apeqqutit ilisimatusaatigalugu suliamut tunngasut uunga nassiunneqarsinnaapput oq@uni.gl.