Ilisimatusarfimmi ukiuunerani allagartartaartitsineq

Tallimanngornermi februaarip 27-ani 2026 Ilisimatusarfiup ukiuunerani soraarummeertunik 45-nik allagartartaartitsinermini tulluusimaaqaluni siunissamullu isumalluarluni ullorsiortitsivoq.

Soraarummeertunik allagartartaartitsinermi soraarummeertut, ilaqutaasut, sulisut ullormi nalliuttorsiorfiusumi katerisimaarput, ilungersorlutillu suliaqarsimasut, suliamut piginnaasaqalersimasut qasusuissimanerallu malunnartinneqarput.

Ukioq manna ukiuunerani allagartartaartuni bachelorinngortut 26-upput, kandidatinngortut 17-iupput masterinngortullu marluullutik, taakkualu tamarmik suliassaqarfinni assigiinngitsuni nutaanik ilisimasaqalersimallutik nukittuunillu piginnaasaqalersimallutik inuiaqatitsinni tapersiisinnaanngorput.

- Ulloq allagartartaartitsiffik immikkuullarissuujuaannarpoq. Ilinniartuutitta ingerlaarfimminnik naammassinninnerannik - nutaamillu ingerlaarfeqalernerannik - ersersitsisuusarpoq. Allagartartaartuutivut tamaasa inuiaqatitsinnilu allanngueqataanissaat tulluusimaarutigaagut, rektori Mari Kleist taama oqarpoq.

Ilinniakkani ukunani allagartartaartitsivugut:

• Inuussutissarsiornermi aningaasaqarnermut ilisimatusarneq: bachelori 1

• Tusagassiorneq: bachelori 1

• Inatsisilerineq: bachelorit 3-t & kandidati 1

• Inuiaat kulturiat oqaluttuarisaanerallu: bachelorit 3-t & kandidatit 8-t

• Ilinniartitsineq: bachelorit 2-k & atuartitseriaatsimi masterit 2-k

• Nutserineq oqaluttaanerlu: bachelorit 5-t

• Inuiaqatigiilerineq: kandidatit 7-k

• Isumaginninnermi siunnersortit: bachelorit 8-t

• Oqaasilerineq, atuakkialerineq tusagassiuutilerinerlu: bachelorit 2-k & kandidati 1

• Peqqissaasoq: bachelori 1

Ulloriaq Grønvold, nunatsinni siullerpaatut Ilisimatusarfimmi cand.jur.-tut naammassisoq immikkut ittumik aamma nalliuttorsiutigaarput. Nunatsinni inatsisilerinermi kandidatinngorniarfiup pilersinneqarnera sioqqullugu Ulloriaq danskit ilisimatusarfianni semesterimi ataatsimi ilinniarsimavoq, taamaasillunilu Ilisimatusarfimmi pisortatigoortumik kandidatinngorniat siulliit aallartimmata siuarsimasimalluni. Ulloriap angusaqarnera inuttut killiffiinnaanngilaq, aammattaarli nunatsinni inatsisilerinermik ilinniartitaanerup iluani oqaluttuarisaanikkut angusaqarfiuvoq.

Allagartartaartitsinermi agguaqatigiissillugit karakteriginnerpaanut marlunnut aammattaaq nersornaasiisoqarpoq.

Bachelorinngortuni agguaqatigiissillugu karakteriginnerpaaq isumaginninnermi siunnersortinngorlaaq Sara Niviaaluk Frederiksen Ilisimatusarfimmit nersornaaserneqarpoq - aamma Ulloriaq Grønvold inatsisilerituunngorniarfimmeersoq Sulisitsisunit kandidatinngortuni agguaqatigiissillugu karakteriginnerpaatut nersornaaserneqarpoq.

Sarap aamma Ulloriap soraarummeernerminni angusarissaarneranni pilluaqqungaarpagut.

Allagartartaartuutivut tamarmik immikkut ilisimasaqalerput, inuiaqatittalu ineriartorneranni maanna nukittuumik taperseeqataasinnaanngorlutik. Ilaat atorfinittut, ilaat ingerlaqqiffiusumik ilinniaqqillutillu ilisimatusarnikkut suliassaqarfimmi ilinniarnertik ingerlateqqissavaat.

Ukiuunerani allagartartaartitsineq taamaammat immikkut angusaqarfiuvoq - soraarummeertunuunnaanngitsoq aammattaarli ilinniartitsisuuterpassuatsinnut, siunnersortinut ilaqutaasunullu aqqut tamakkerlugu malinnaasimasunut.

Ataatsimoorluta ulloq nuannaffiusoq, oqiliffiusoq siunissamullu neriuuteqartitsisoq nalliuttorsiutigaarput.

Tamaasa pilluaqqungaarpagut.