Atuakkami nutaami nunatsinni isumaginninnermut politikkimi unammillernartitat paasisaqarfigineqarsinnaalersut

Steven Arnfjord atuakkiorsimavoq ima qulequtserlugu Grønlands socialpolitik - dannelsen af et arktisk velfærdssamfund (Kalaallit Nunaata isumaginninnermut politikkia - Issittumi inuiaqatigiinnik atugarissaartitsinermik pilersitsineq), tassanilu nunatsinni isumaginninnermi unammillernartut taakkualu aaqqissugaanikkut aallaavii qitiutinneqarput.

Isumaginninnerup iluani ajornartorsiutit arlallit sooq takkuteqqittarnersut qanorlu aaqqiissuteqarniarluni suliniuteqartoqaqqissinnaanersoq atuakkami misissorneqarput.

Oqaluttuarisaanerup tungaanit nalitsinniillu sammiviliinikkut nunatsinni isumaginninnermut politikkip ineriartornera sammineqarpoq, tamatumani sammisat nutaajunerit aamma politikkit atuuttuusut atuutsilersinneqarneri immikkut isiginiarneqarlutik.

Qitiusumik suliassaqarfiit soorlu meeqqanut ilinniartitaanermullu, isumaginninnermut siunnersortinut, utoqqarnut, suliffeqarnermut suliffeqannginnermullu, innarluuteqarnermut, piitsuunermut aamma angerlarsimaffeqannginnermut tunngasut ataatsimoortumik misissoqqissaarneqarsimasumillu sinaakkuserlugit paasissutissiissutigineqarput.

Atuakkami suliatigut misissueqqissaarneq inuttullu eqqarsaatersuutit ataqatigiissinneqarput - atuagarlu ilinniartunut, ilisimatusartunut, ilinniartitsisunut kikkunnullu tamanut isumaginninnermut politikkimut nunatsinnuttaaq soqutigisalinnut saaffiginnippoq.

Atuagaq pillugu uani atuarnerugit.