Nunatsinni angerlarsimaffiup avataanut inissiisarneq pillugu atuakkami nutaami meeqqat oqaaseqartinneqartut

Bonnie Jensen atuakkiorsimavoq ima qulequtserlugu Barndomshjem eller børnehjem - grønlandske børn anbragt uden for hjemmet (Illu meeraaffigisaq imaluunniit meeqqanut angerlarsimaffik - kalaallit meerartai angerlarsimaffiup avataanut inissinneqarsimasut), atuakkami tassani nunatsinni ulloq unnuarlu paaqqinnittarfinni meeqqat inissinneqarsimasut misigisaat qitiutillugit sammineqarput.

Inissinneqarnerit assigiinngitsunik misigineqartarsinnaasut atuakkami ersersinneqarpoq.

Meerarpassuit paaqqinnittarfik meeqqat angerlarsimaffiattut toqqissisimananngitsutut nuanniitsunillu misigisaqarfiusutut, inersimasunngornerminnilu kinguneqartitsisinnaasutut, misigisarpaat.

Meeqqalli ilaasa meeqqat angerlarsimaffiannut inissinneqarnertik toqqissisimanartittarpaat, aalaakkaasunik attaveqateqarfigisatut inersimasullu najuuffigisartagaattut misigalugu meeraanerminni angerlarsimaffittut misigisarpaat.

Nunatsinni meeqqat angerlarsimaffiup avataanut inissinneqartarnerat pillugu misissuinerni siullerpaamik meeqqat namminneq oqaluttuaat aallaavigineqarput.

Angerlarsimaffiup avataanut inissiisarnermut suliassaqarfik pillugu meeqqat misilittagaat ilisimasanik assigiinngisitaartunik tapersiipput, taamaasillunilu ersersinneqarpoq meeqqat atugarliortut pillugit suliniarnerit qanoq nukittorsaavigineqarsinnaanersut.

Atuakkap tamakkiisumik oqariartuutaa ersarippoq: Meeqqat tusarnaarnerisigut pitsaanerusunik sinaakkusiorsinnaallutalu inuit amerlasuut inuuneri pitsanngorsaavigisinnaavagut.

Atuagaq pillugu uani atuarnerugit.