Misissuinermik nalunaarusiaq nutaaq: Kalaallit Nunaanni innuttaasut apeqqutit nunanut allanut sillimaniarnermullu politikkeqarnermut tunngasut qanoq isumaqarfigaat?

Issittumi sillimaniarnikkut inissisimaffik pillugu, pissaanilissuit USA, Rusland aamma Kina pillugit kiisalu NATO-mi, EU-mi Issittumilu Siunnersuisooqatigiinni nunat tamalaat suleqatigiinnerat pillugu kalaallit qanoq isumaqarpat?

Sisamanngornermi decembarip 12-ani 2024 Nasiffik nalunaarusiamik nutaamik saqqummersitsissaaq, nalunaarusiami tassani Kalaallit Nunaanni innuttaasut apeqqutit arlallit nunanut allanut sillimaniarnermullu politikkeqarnermut tunngasut qanoq isumaqarfigineraat misissorneqarpoq.

Nunatsinni innuttaasut akornanni amerlanernik sinniisut 702-t oqarasuaatikkut apersorneqarnerat nalunaarusiami tunngavigineqarpoq, nalunaarusiortullu nalunaarusiami paasisat pingaarnerit oqallisigissavaat.

Oqalugiartussat

• Rasmus Leander Nielsen, lektori Nasiffimmilu - Nunanut Allanut Sillimaniarnermullu Ilisimatusarfimmi pisortaq, Ilisimatusarfik
• Maria Ackrén, professori Nasiffimmilu - Nunanut Allanut Sillimaniarnermullu Ilisimatusarfimmi ilisimatusartoqatigiinnut aqutsisoq, Ilisimatusarfik
• Mininnguaq Kleist, naalakkersuisoqarfimmi pisortaq, Naalagaaffinngornissamut Nunanullu allanut Naalakkersuisoqarfik

Saqqummiisoqareernerup kingorna nalunaarusiaq Nasiffiup nittartagaatigut atuarneqarsinnaalissaaq.

Nalunaarusiaq misissuinermik nalunaarusiatsinnut 2021-imi saqqummersinneqartumut assingusumut malittarinninneruvoq.