Aviaq Fleischerip ph.d.-nngorniutiminik illersuinera

Uani ph.d.-nngorniummi allaaserisanik misissukkanik toqqammavilimmi, Kalaallit Nunaanni 1970-ikkunniit tusagassiutitigut ineriartornerup isikkivinnit assigiinngitsuniit isigalugu misissuineruvoq.

Allaaserisami Kalaallit Nunaanni ataatsikkoortumik tv-qaleqqaarneq ukkatarineqarpoq, misissueriaaserlu diskursanalysemik taagorneqartartoq atorlugu tusagassiutini imarineqartartut misissoqqissaarneqarput aammalu KNR-TV-mi Tusaat tv-Aasiaasimasumilu toqqortaatit qanoq issusaat imarisaallu paasiniarneqarlutik.

Allaaserisani sisamani najoqqutarineqartuni, Kalaallit Nunaanni tusagassiutit oqaluttuarisaanerannit assigiinngitsuniit isigalugu takutinneqarpoq.

Allaaserisaq siullermi norskiusup danskiusullu Hans Egedep tusagassiutini saqqummiunneqartarnera ukiuni 50-ini (1971-2021) sukuiarneqarpoq.

Tassani aamma atuarneqarsinnaavoq kalaallit inuiaqatigiivisa oqartussaasunut isummertaasaasa allanngornerat.

Allaaserisami tullermi DR-ip KNR-TV-llu ataatsikkoortumik tv-qalernerup 1982-imi atuutsinneqalernerani suleqatigiinneq misissoqqissaarneqarpoq, pissaaneqarnermik isiginnittaaseq aallaavigalugu.

Allaaserisami tassani takutinneqarpoq KNR-TV-p aallartisartup taavalu DR-ip sunniuteqarsinnaalluartutut isigineqarsinnaasup oqartussaanermik oqimaaqatigiinngitsumi inissisimaneri.

Allaaserisat pingajussaanni isiginnaartartut KNR-TV-p toqqortaataasa qanoq igineri ukkatarineqarpoq, isiginnaartartut aallakaatitassiat aallakaateqqinneqartartullu qanganisaanerusut isummerfigaat.

Allaaserisami sisamassaasumi kingullermilu Tusaat tv-Aasiaasimasup tv-mi aallakaatitassiat toqqortaatai sammineqarput, taakku Aasianni katersugaasivimmiilersimasut.

Aallakaatitassiat sunik imaqarnersut qanorlu innersut oqaluttuarineqarpoq, tassungalu atatillugu Kalaallit Nunaanni allagaateqarnermut inatsit aammalu kulturikkut eriagisassanik kulturikkut kingornussatut illersuineq pillugu inatsisit oqallisigineqarlutik.

Tamakkiisumik allaaserisap ersarissarpaa, qanoq kalaallit inuiaqatigiivisa tusagassiutinit nunatsinneersunit nunanilu allaneersunit sunnertittarneri aammalu ataatsikkoortumik tv-qalernerup 1982-imi aallarteqqaarneraniit qanoq taanna sunnertinneq ingerlasimanersoq.

Tusagassiutit sunniiniartarnerat (medieimperialistisk) aallaavigalugu Kalaallit Nunaanni tusagassiutinit sunnertinneq, nunani allani tusagassiutit sunniisarnerisulli (Amerika minillugu) ingerlasimavoq.

Allaaserisami pingaarnermi Kalaallit Nunaanni siunissami tv-qarneq qanoq ingerlasinnaanersoq oqallisigineqarpoq aammalu allagaateqarnermut inatsit kulturikkullu eriagisassanik kulturikkut kingornussatut illersuineq pillugu inatsisit qanoq suliareqqinneqarsinnaanersut siunnersuusiortoqarluni, Kalaallit Nunaata oqaluttuassartaa nutaanerusoq tv-kkut aallakaatittakkanit aallaaveqartut tammatsaalineqassappata.

Najoqqutatut allaaserisami atorneqartut katersat tassaapput, Kalaallit Nunaanni tusagassiutineersut (radio, aviisit, tv, nittartakkani nutaarsiassat aammalu inuit attaveqatigiittarfiineersut), ilisimatusaatitut allaaserisat, atuakkiat piviusulersaarutit takorluukkiallu, inatsisit nalunaarutillu, nalunaarusiat, suleqatigiinnissamut isumaqatigiissutit, eqqumiitsuliortunik KNR-milu atorfeqartunik apersuinerit minnerunngitsumillu isiginnaartartut apeqqusiannik immersugaannit akissutissarsinermi.