Issittumi illersornissamut upalungaarsimanermullu suliassani najukkameersut aamma nunap inoqqaavisa ilanngunneqarnerat

Jeppe Strandsbjergip aamma Signe W. Lindbjergip nalunaarusiassaat tunngavigalugu isumasioqatigiisitsinermi uani illersornissamut upalungaarsimanermullu suliassani najukkameersut ilanngunneqarnissaat ukkatarissavarput.

Misissuinermi piviusunik katersat Canadameersut Islandimeersullu tunngavigalugit misilittakkat tassanngaanneersut nunanitsinni, Issittumi Tunngaviusumik Ilinniarfimmik aamma Canada assigalugu nunatsinni sakkutooqatigiinnik ’rangers’-inik pilersitsisoqarnissaanut periarfissaq pillugit sammisaqarfiusumi, oqallinnermut qanoq ilanngunneqarsinnaanersut eqqartussavagut.

Issittumi najukkameersut aamma nunap inoqqaavi ilanngunneqartarnerat pillugu misilittakkat Kalaallit Nunaanni illersornissamut sillimaniarnermullu politikkimik ineriartortitsinermi sammisatut pingaarutilittut ilaasinnaapput. Issittumi nunani arlalinni upalungaarsimanermut illersornissamullu piginnaasat nukittorsarnissaannut najukkaneersut ilanngunneqarnissaat ukkatarineqarpoq. Issittumi nunat amerlasuut assigiissutaat tassaavoq nunami innuttaasut imminnut avinngarusimasumiiffianni angalaniarnerup ajornakusoornartuunera. Canada Islandilu ukiuni arlalinngortuni illersornissap sillimaniarnerullu iluanni suliassani najukkaneersunik ilanngussisarnermik iluatsilluartumik ingerlassaqartuupput, taakkualu assilisassiat assigiinngitsut malillugit pisarput, taakkua aamma assigiissutaat tassaavoq sillimaniarnerup iluani suliassarpassuarni najugallit inuiaqatigiit, avatangiisitik silallu pissusaanik ilisimasaat atorneqarsinnaasarmata, ajutoortoqarpallu nuna tamakkerlugu sungiusarsimasunik sulisoqarnikkut annaassiniarneq sukkanerusarnera.