Kalaallisut ilinniartitsisut ilinniarsimasut annertuumik amigaatigineqartut - Ilisimatusarfimmit oqaaseqaat

Kulturimik, Oqaatsinik Oqaluttuarisaanermillu Ilisimatusarfimmi Oqaasilerinermi, Atuakkialerinermi Tusagassiuutilerinermilu kandidatit amigaatigineqaqisut ilinniagaqartittarpavut. Killiffipput uaguttaaq ernummatigaarput, tamanna uatsinnut aamma annertuumik unammillertitsivoq tamannalu ilutigalugu aaqqiivigineqarnissaanut tapersiiniarsarivugut.

Ilinniartitsisut, ilitsersuussisut soraarummeertunillu nalileeqataasartut amigaataaneri

Oqaasilerinermut, Atuakkialerinermut Tusagassiuutilerinermullu immikkoortortaqarfitsinni ilinniartitsinerup isumannaarneqartarnissaanut atatillugu unammillernartut annertuut aammattaaq aqqusaarpagut - pingaartumik oqaasilerinerup atuakkialerinerullu iluani, taakkunanimi adjunktit lektorillu kalaallit oqaasiinik atuakkialerinermilu siammasissumik ilinniartitsisinnaasut pisariaqartinneqarmata. Ilinniakkap ilaa annertooq pingaaruteqartorlu kalaallit oqaasiinik sammisaqarfiusoq sualummik ilungersunartorsiorpoq. Ilinniartut suliassaminni soraarummeernerminnilu kalaallit oqaasiinik suliaqarsinnaasarnissaat ilinniakkami uani sualummik pingaaruteqarpoq, kisianni kalaallisut oqaasilinnik ilitsersuisunik soraarummeertunillu nalileeqataasartunik amigaateqarnerup aaqqiivigineqarnissaa ajornakusuukkajuttarpoq.

Bacheloritut kandidatitullu ilinniarfitsinni ilinniartitsinerni amigaatigineqartut aaqqiivigineqarnissaat, GUX-ituulli, ilungersuutigaarput. Taamaammat ilinniartitsisut avataaneersut, immikkut ilinniagallit, pisuni amerlanerpaani tassaasartut soraarummeertuutivut, allani atorfillit soorlu pisortat allaffeqarfiini atorfillit, pisariaqartilluinnartarpavut. Piumasaqaatit annertuut aamma akissarsiarititarisinnaasagut pissutaallutik soraarummeertuutitsinnik pissarsiniartarnerput aamma ajornakusoortittarparput. Sumiiffinni allani suliffittaarnissaat ajornarneq ajorpoq, amerlanertigullu akissarsiaginnerusarlutik. Kandidatitut ilinniagartik naammassinnginneranni amerlanertigut suliffeqareertarput.

Ilinniakkamik iluarsaaqqiineq ilinniakkamilu atugarissaarneq

Ilisimatusarfiup 2023-mi Kulturimik, Oqaatsinik Oqaluttuarisaanermillu Ilisimatusarfimmi oqaatsit pillugit ilinniakkat marluk aaqqissuuteqqissimavai: Oqaasilerinermi, Atuakkialerinermi Tusagassiuutilerinermilu bacheloritut kandidatitullu ilinniagaq aamma Nutserisutut Oqalutsitullu bacheloritut ilinniagaq. 
Tamassuma ilaatigut inernerisimavaa ilinniakkap aaqqissugaaneranik nutaartaqarluinnartumi oqaatsinillu pingaartitsinerusumi Oqaasilerinermi, Atuakkialerinermi Tusagassiuutilerinermilu ilinniakkami 2024-mi ilinnialertussat aallartikkumaartut. Ilinniakkap aaqqissuunneqaqqinneranut atatillugu ilinnialertussanik 2024-mi upernaakkut akuersisoqarnissaanut atatillugu ilinniakkap maluginiarneqarnerunissaanut immikkut suliniuteqartoqassaaq.

Ilinniakkamilu ilinniartut amerlanerusut ilinniakkaminnik naammassinnittarnissaat anguniarneqarnissaa ukkataraarput, tassanilu ilinniakkap aaqqissugaanera nutaaq atortussatsialaavoq: GUX-imit ilisimatusarfimmut ikaarsaarnermi sungiussiniartoqarnera eqqarsaatigineqassaaq, ilinniakkap aallartinnerani sammisaqarnissanut piumasaqaateqartoqarnerullunilu soraarummeernerit ikinnerussapput, suliassaqarfiillu pingasut ataqatigiissinnerulerneqarput - oqaasilerineq, atuakkialerineq tusagassiuutilerinerlu - taakkua tamarmik GUX-imi ilinniartitsisunngorsinnaanissamut piumasaqaataapput. Tamassuma saniatigut ilinniartut ukiumi allami aallartinnikut peqatigalugit fagini siornatigulli ilinniaqatigisarunnaarlugit, suliassaqarfinni pingasuni ilinniartut suliatigut ineriartornerat ataqatigiinnerulerlunilu qaffakkiartussaaq. Ilinniakkap uatsinnit aningaasartuutigineqarnerunissaa pisariaqartinneqarpoq, pitsaanerusumilli aamma amerlanerusunik ilinniartunik amigaateqartoqarneranut oqimaaqatigiissitsisoq isumaqarpugut, tamassumalu piviusuunera nalunngilluinnarparput.

Oqaatsinik ilisimatusarnerup nukittorsarneqarnera aamma adjunktinik ilinniagaqartitsineq - ilinniakkap siunissaa

2021-mili Kulturimik, Oqaatsinik Oqaluttuarisaanermillu Ilisimatusarfik Oqaatsinik Ilisimatusarfeqarpoq - ilisimatusarfimmi tassani ilisimatuutut misissuineq nukittorsarniarlugu ilisimatusarfik avataaneersumik aqutsisoqarpoq. Ilaatigut sulisuvut adjunktitut atorfeqarlutik ilinniartut tapersersorniarlugit ilisimatusarnermi atugassarititaasut ilisimatusarfiup pitsanngorsaavigai. Oqaatsinik Ilisimatusarfimmi ullumikkut projektinik arlalinnik suliaqartoqarlunilu avataaneersunik professoreqarpoq, taakkua adjunktitsinnik ilitsersuisarlutillu ilinniartitseqqiisarput. Ilisimatusarfimmik qaffasissusilimmik kalaallisut aamma oqaatsinik ilisimatusarnermi ilinniartitsiinnarsinnaanissatsinnut maani ilinniarsimasut pingaaruteqarluinnartutut inissisimapput.