Ilisimasat nalituut

Nittartakkatsinni podcasti nangeqattaartuliaq "Ilisimasat nalituut" tusarnaarsinnaajuarakku eqqaamajuk, tassani ilinniartuutivut naammassisimasut specialiliatik oqaluttuaraat (kalaallisut).

Uani ukua tusarnaarsinnaavatit:

• Aviaq Reimer Olsen: Aviap specialiliamini atuartut Nuummi ilinniarnertuunngorniarlutik atualeraangamik kulturinik assigiinngitsunik marlunnik avatangiiseqalikkajuttarnerat sammivaa, tamannalu atuartut aamma ilinniartitsisut akornanni ajornartorsiutinik paatsoornernillu pilersitsisinnaasarpoq - misissuinerminilu ilaatigut G50-imut utertariaqarsimavoq.

• Ane-Mette Broberg Damgaard: Ane-Mettep specialia Kalaallit Nunaanni isiginnaartitsisarnermut tunngavoq - allaaserinninnerminili unammillernartumik aqqusaagaqarsimavoq, tusagassiuutinimi isiginnaartitsisarneq pillugu allaaserisat oqallinnerillu amigaataammata.

• Camilla Kleemann-Andersen: Camillap specialimini kalaallit oqaasii misissoqqissaarpai, tamassumunngalu misigissutsit attuumassuteqartut - oqaatigisaatullu: oqaasitsinnik oqallinneq pineqartillugu misigissutsit takkuttartut eqqartunngikkutsigit aamma misigissutsit taakkua tunuliaqutaat oqaluuserinngikkutsigit qaangernavianngilagut.

• Heidi Rosing: 1970-ikkunni nipilersoqatigiit Sumé pillugu piviusulersaarusiap "Mumisitsinerup nipaa"-ta isiginnaareernerata kingorna Heidip specialimini inuiaqatigiit isumaat misissorsimavai.

• Marianne Jensen: Mariannep specialimini 1950-60-ikkunni sanaartornermi suliffeqarfiit aalajangiisariaasiat misissorpaa apeqqullu una apeqqutigalugu 'nunasiaataareernerup kingorna eqqugaaneq imaluunniit ajornartorsiutit nammineq pilersinneqarsimasut?'.

• Angutinnguaq Olsen: Qanga aamma nalitsinni aavartarneq pillugu Angutinnguup specialimini misissorsimavaa - taassumallu Nassuttooq nunatsinniittoq siullersaalluni misissorsimavaa.

• Ulunnguaq Markussen: Ulunnguup specialimini nunatsinni amerlanerussuteqartut sooq namminiilivinnissaq kissaatigigaat misissorsimavaa.

• Apersuisoq: Nivi Pedersen
• Ingerlatsisoq, aaqqissuussisoq isumassarsisorlu: Mudi Kramer Berthelsen
• Nipilerisoq nipilersortorlu: Fabrizio Barzanti
• Ilisimatusarfimmit suleqatigisaq: Per Arnfjord

Podcasti nangeqattaartuliaq "Ilisimasat nalituut" ukunannga aningaasaliiffigineqarpoq:

• Namminersorlutik Oqartussat kulturimut aningaasaliissutai
• Tapiissuteqartarfik Sermeq
• Tips & Lottop aningaasaliissutai
• NunaFonden