Pinngortitaleriffiup Ilisimatusarfiullu akornanni suleqatigiinnissamik isumaqatigiissutip nutarterneqarnera ilisimatusarnermik ilinniartitaanermillu nukittorsaasoq

Pinngortitaleriffimmit aamma Ilisimatusarfimmit nuannaarutigisatsinnik nalunaarutigisinnaavarput suleqatigiinnissamik isumaqatigiissuterput nutarterneqarmat, tamannalu suliffeqarfitsinnut marlunnut ingerlariaqqitsitsivoq.

Suliassaqarfiit akimorlugit suleqatigiilernerulernikkut nunatsinni ilisimatusarnerup aamma ilinniartitaanerup siuarsaavigineqarnissaannut ataatsimut anguniakkatsinnik isumaqatigiissuterput nutarterneqartoq nukittorsaavoq.

Isumaqatigiissummi nutarterneqartumi suliniutit arlaqartut qitiutinneqarput. Taakkualu ilinniartunut, ilisimatusartunut inuiaqatigiinnullu ataatsimoortillugit iluaqutaassapput.

Isumaqatigiissummi ilaatigut ilaasut tassaapput:

• Suliassaqarfinni assigiinngitsuni ilisimatusarnermi ph.d.-nngorniarnernilu suliniutit - suliffeqarfiit taakkua marluk qaninnerusumik suleqatigiinnissaannik qulakkeerinnittut, tassani nutaaliortumik ilisimatusarneq ukkatarineqarluni.
• Ataatsimut isumasioqatigiissitsinerit aamma ataatsimeersuartitsinerit - ullumikkut ilisimatusarnerup iluani suliassaqarfinni ajornartorsiutaasullu pillugit oqaloqatigiinnernik siuarsaasussanik ilisimasanillu avitseqatigiiffiusussanik aaqqissuussanik ingerlassisassaagut.
• Pikialaarfimmi uumassusilerinermi SILA-mi bacheloritut ilinniakkap aallarnerneqarnera - Kalaallit Nunaanni uumassusilerinerup iluani ilinniagaqarnissamut periarfissanik annertusaanermut alloriarneq pingaarutiliusoq.
• SILA-mi uumassusilerinermi bacheloritut ilinniakkamut Pinngortitaleriffiup ilisimatusartuinik atassusiineq - taamaasilluni ilinniartut ilinniarnerminni ilisimatusartunit siuttunit immikkut ilisimasalinnit ilitsersorneqarsinnaanngussapput.
• SILA-mi uumassusilerinermi bacheloritut ilinniakkamik ineriartortitsinermi Pinngortitaleriffiup peqataatinneqarnera - suleqatigiinnerup tamassuma ilinniakkap naleqquttuunissaa aamma ilisimatusarnernut kingullernut malinnaasuunissaa qulakkiissavaa.
• Ilisimatusaatit aamma ilisimatusarnerit pillugit nalinginnaasumik inuiaqatigiinnut malunnartitsiniaanermi aallussaqartitsiniarnermilu - tamanut ammasumik ataatsimut aaqqissuussisarnerit.
• Campus 2-p ineriartortinnissaanut suleqatigiinneq - siunissaq ungasinnerusoq eqqarsaatigalugu suliniut maanna campus Ilimmarfiusumik allisitsisussaq ilisimatusarnerullu aamma ilinniartitsinerup sinaakkutaanik nukittorsaasussaq.

Tamassumunnga atatillugu rektori Gitte Adler Reimer ima oqarpoq:

”Pinngortitaleriffiup Ilisimatusarfiullu akornanni suleqatigiinnissamik isumaqatigiissut nutartermat qanimut suleqatigiinnitta nangeqqinnissaa qilanaaraarput, suleqatigiinnerpullu ilisimatusarnerup ilinniartitaanerullu iluanni nunatta inissisimaffianik nukittorsaaqataassaaq - ataatsimoorlutalu ilinniartunut aamma ilisimatusartunut periarfissanik nutaanik pilersitsisinnaanngussaagut kiisalu Issittumi ilisimatusaatit ineriartortitsinerullu iluanni ilinniartoqarfitta siuttuuginnarnissaat qulakkiissavarput”.

Paasisaqarnerorusukkuit - qinnuigaatsigit rektori Gitte Adler Reimer attavigeqqullugu uunga gitr@uni.gl imaluunniit +299 38 56 02.