Nalliuttorsiorneq nuannannerlu: Ilisimatusarfimmi allagartartaarlutik soraarummeertut

Ulloq februaarip 28-at 2025 maani Ilisimatusarfimmi persuarsiorfiuvoq, ullormi tassani campusimi maani nuannattoqarpoq, tulluusimaartoqarlunilu ataatsimooqatigiittoqarpoq.

Bachelorinngortummi 28-t, kandidatinngortut 7i-t masteritullu naammassisut 3-t maanna ilinniarsimasutut imminnut taasinnaanngortut nalliuttorsiutigaagut.

Ullormi tassani persuarsiorpalaartunik oqalugiartoqarpoq, kiinnat nuannaartut takussaapput ilinniartullu pikkorissut ersartaanneqarluarlutik, taakkuami ilinniakkatik suliumatussuseqarlutik tunniusimalluarlutillu naammassivaat. Ukiuni arlalinni pimoorussillutik suliaqareerlutik suliatigullu pissanganartunik angusaqareerlutik soraarummeernermut uppernarsaatitik pissusissamisoortumik pissarsiaraat, taakkualu allagartartaarneranni ilaqutaat, ikinngutaat ilinniartitsisuilu angusaannik malunnartitseqataasut najuupput.

Campusimi persuarsiorneq malunnarpoq, tassanimi bacheloritut kandidatitullu naammasserlaartuutigut ataatsimoorluta persuarsiutigaagut, taakkualu Ilisimatusarfimmut nukittuumik sinniisuullutik silarsuarmut maanna appakaapput.

Soraarummeerlutik allagartartaartuutivut tamaasa pilluaqquagut - ingerlariaqqinnerannilu pitsaanerpaanik tamanik kissaappagut. Ilinniarnissinni ilaasinnaasimagatta tulluusimaarutigaarput!

Soraarummeerlutik allagartartaartuutitta takussutissartaat aana.

Bachelorinngortut:

• Inuussutissarsiornermi aningaasaqarnermut ilisimatusarneq: 1
• Tusagassiortoq: 1
• Inatsisilerineq: 2
• Inuiaat kulturiat oqaluttuarisaanerallu: 5
• Ilinniartitsisoq: 2
• Nutserisoq oqalutsilu: 4
• Inuiaqatigiilerineq: 3
• Isumaginninnermut siunnersorti: 7
• Oqaasilerineq, atuakkialerineq tusagassiuutilerinerlu: 3

Kandidatinngortut:

• Inuiaat kulturiat oqaluttuarisaanerallu: 2
• Inuiaqatigiilerineq: 3
• Oqaasilerineq, atuakkialerineq tusagassiuutilerinerlu: 2

Masteritut naammassisut:

• Tusagassiornermik: 3

Soraarummeertullu allagartartaarneranni ilinniartut nersorpavut - nersorneqartullu tassaapput:

• Malik Foss Ingemann bachelorinngortuni angusarinnerpaatut KNI-mit akissarsitinneqarpoq
• Elin Neshamar kandidatinngortuni angusarinnerpaatut Sulisitsisunit akissarsitinneqarpoq