Uumassusilerinermi bachelorinngorniarfimmi SILA-mi ilinnialerlaat 12-it misigisaqarnissaminnut piareeqqasut

Uumassusilerinermi SILA-mi bacheloritut ilinniakkami ilinniartut nutaat 12-it pisortatigoortumik manna aallartissimalerput - Pikialaarfimmullu siullerpaamik isermata pissangasoqarnera malugaarput. Illu ilinniarfiat pinngortitamik ilisimatusarnerup iluani ilinniarfiunissaanut immikkut sananeqarnikuuvoq.

Pissangasoqarnera annertummat SILA-mi ilinniartut ulloq ilinniarfigisaat siullerpaaq eqqissimanartuutillugulu toqqissisimanartuutinniarsarisimavarput - ilinniakkamimi tassani tarnikkut timikkullu peqqissuseq qitiutinneqarmat.

Taamaammat annertuunik oqalugiartoqanngilaq, naatsorsuuteqartoqaranilu piumasaqaateqartoqanngilaq. Ilinniartut imminnut aamma ilinniartitsisussatik annikitsunik eqimattakkuutaarlutik naapinnissaannut periarfissinneqarput, tamatumalu kingorna kalaaliminernik ulloqeqqasioqatigiittoqarluni.

Naak ilinniartut uumassusilerinerup iluani teoriit ilinniarnissaannut aamma asimukarnissaminnut piareersimalluinnaraluartut, teoriit samminnginneranni aamma sumiiffinni ornigullutik suliaqannginneranni ilinniakkami sapaatip akunnera siullerpaaq immikkuullarissoq ilisarititsinermut atorsimavarput.

Sapaatip akunnerani siullermi ilinniartut workshoppertinneqarput, tassani Inuit ilisimasaat naleqartitaallu qitiutinneqarsimapput, ilinniartut imminnut tusarnaarsimapput tamannalu ukiuni pingasuni tullinnguuttuni ilikkariartornissaannut tunngavissiissaaq.

Ilinniagaq immikkuullarilluinnartuusoq

Ilinniartuutitaavut uumassusilerinermi teoriit arlallit atuarlugit ilinniaannassanngillat - aammattaarli Issittumi nunaannarmukassapput uumassusillillu tamarmik inuulluataartut qanimut takussavaat. Pinngortitami najuulluni pissanganartumik sulinermit qaffasissusilimmik laboratoriami ilisimatusarnermut, silarsuarnit taakkunannga marlunnit pitsaanerpaat ilinniakkap SILA-p katiguppai.

Ilinnialerlaat aallartilluarput tunniusimanerallu takuneqarsinnaalereerpoq. Maani misigisassaqarlutillu ilikkagassaqangaarlutik siunissaq periarfissanik ulikkaartoq ornippaat.

Ilinniartut ilisimatusarusukkunik, avatangiisinut tunngasunik ingerlatsinermik suliaqarusukkunik imaluunniit ilinniartitsisunngorusukkunik taava - nunatsinni nunanilu tamalaani - allanngueqataanissaminnut qajannaatsumik toqqammavissaqalerput.

Ilinnialersut tikilluaqqusinnaagatsigit tulluusimaarutigaarput ineriartornerisalu malinnaaviginissaat qilanaaraarput.

Ilinniarfimminni pissanganaqisumik ilinniarnissaat aatsaat aallartileruttorpoq!