Ileqqussaasut - Kalaallit Nunaanni ilisimatusarnermi ileqqorissaarnissamut najoqqutassanik ineriartortitsineq

Ilisimatusarfik aamma Nunatsinni Ilisimatusarnermik Siunnersuisoqatigiit maanna ileqqorissaarnissamut najoqqutassanik ineriartortitsinermik atuutsilernissaannillu suliaqarput. Najoqqutassiat ilisimatusarnerit piujuartitsinissamut tapertaasut sumiiffinni kisarsimasuunissaannik kulturikkullu naleqquttunik ingerlanneqarnissaannik qulakkeerinneqataassapput.

Ilisimatusarfimmi rektorip Gitte Adler Reimerip aamma Josephine Nymandip, Nunatsinni Ilisimatusarnermik Siunnersuisoqatigiit siulittaasuata Sisimiuni Nuummilu innuttaasut najoqqutassiarineqartunut ilanngussassatut innersuussutinillu tunniussinissaannut qaaqquaat - arfininngorneq 4. november nal. 14.00 - 15.00 Taseralimmi, Sisimiuni aammalu sisamanngorneq 9. november. Nal 16.30 - 18.00 Katuami, Nuummi.

Rektori Gitte Adler Reimerip oqaatigaa:

"Ilisimatusarnermi ileqqorissaarnissaq tassaavoq ilisimatusarnermi inuaqatigiinni aallaaveqartumik ileqquusunut, naleqartitanut aammalu kulturimut naleqquttutut naleqqutinngitsutulluunniit isiginninneq. Ileqqorissaarnissamut najoqqutassiat ineriartortinneri inuiaqatigiinnit kalaaliusunik akuersaarneqarlutik taperserneqarlutillu ilisimatusarnermi kulturimik inerisaassapput."

Josephine Nymand, Nunatsinni Ilisimatusarnermik Siunnersuisoqatigiinni siulittaasoq ilaliivoq:

"Ilisimatusartoqarfinni ilisimatusarnermi ileqqorissaarnissamut najoqqutassiat inuiaqatigiinni akisussaassuseqarnermik piujuartitsinermillu ineriartortitsinermik nukittorsaaqataassapput. Nuna sinnerlugu ilisimatusarnermi aammalu ilisimatusartut, innuttaasut, ingerlatsiviit, inuussutissarsiorfiit allallu soqutigisaqaqatigiit akornanni sakkussaapput pingaarutillit."

Suliniut Ileqqussaasut

Ilisimatusarnermi ileqqorissaarnissamut najoqqutassiat kissaatigineqarneri aallaavigalugit Nunatsinni Ilisimatusarnermik Siunnersuisoqatigiit 2020-mi suliniut taaguuteqartinneqartoq Ileqqussaasut aallartisarpaat, tassani ilisimatusarneq aallaavigalugu ilanngussassanik katersineq pissalluni Kalaallillu Nunaanni ileqqorissaarnermik najoqqutassiassamut innersuussutiliortoqassalluni.

Suliniummi innuttaasunit, ilisimatusarfeqarfinnit, ilinniarfeqarfinnit, inuussutissarsiorfinnit, Namminersorlutik oqartussanit, kommuninit allanillu soqutigisaqaqatigiiffinnit ilanngussassanik innersuussutininillu katersineq pissaaq, taamaasilluni najoqqutassianik piginninnerup nukittuujunissaa anguniarlugu inerisarneqassalluni. Najoqqutassanik atuutsitsilernissaq ilaatigut politikkinik ineriartortitsinikkut, ingerlariaaseqarnikkut ilinniarnermilu atortussiornikkut pissaaq.

Sisimiuni Nuummilu innuttaasunik ataatsimiisitsineq allaarniutaassaaq. Tulliuttutut alloriarfissaassaaq innuttaasunut ataatsimiisitsinerup workshopernerillu aningaasalersornissaasa qulakkeernissaat, taamaalillutik sapinngisamik sumiiffiit amerlanernit peqataatitsisoqarniassammat.

Erseqqinnerusumik paasissutissat

• Gitte Adler Reimer, rektori, Ilisimatusarfik, gitr@uni.gl
• Josephine Nymand, siulittaasoq, Nunatsinni Ilisimatusarnermi Siunnersuisoqatigiit, jony@natur.gl
• Maliina Jensen, allatsi, Nunatsinni Ilisimatusarnermi Siunnersuisoqatigiit, maje@nis.gl