Maanna siunissamilu Issittumi isumannaassuseq pillugu oqallinneq

Naalagaaffissuit Issittumi unammilleqatigiinnerat sakkutuuminnillu amerliartuinnartunik inissiisarnerat Kalaallit Nunaannut Naalagaaffeqatigiinnermullu qanoq kinguneqassava?

Illersornissamik isumaqatigiissusiornissamut piareersarnermi Issittumi illersornissamik politikki pillugu akeqanngitsumik oqallinnissamut qaaqqusisoqarpoq. Oqallinnermik aaqqissuisuupput Nasiffik - Nunanut Allanut Sillimaniarnermullu Ilisimatusarfik - aamma Forsvarsakademimi Center for Arktiske Sikkerhedsstudier Regeringens Sikkerhedspolitiske Analysegruppe (Danmarkimi naalakkersuisut Sillimaniarnermut politikki pillugu Suleqatigiissitaat) suleqatigalugit, peqataassallunilu Kalaallit Nunaata Nunanut Allanut Naalakkersuisoqarfiat.

Oqalleqatigisinnaassavatit ilisimatuut Ilisimatusarfimmeersut Forsvarsakademimeersullu. Taakku naalagaaffissuit Issittumi pissaaneqarniunnerat tamatumalu Kalaallit Nunaannut innuttaasunullu qanoq sunniuteqarsinnaanera pillugu saqqummiussaqalaassapput.

Aallarniutaasumik saqqummiussisoqarnerup kingorna oqallinneq apersuititsinerlu aallartissaaq.

Kikkut tamarmik aaqqissuussamut tikilluaqqusaapput – ilinniartut, innuttaasut tusagassiortullu. Peqataaniaraanni nalunaarnissaq pisariaqanngilaq.

Aaqqissuussaq danskisut ingerlanneqassaaq, kalaallisullu nutserisoqarumaarpoq. Ataatsimiinnermi kaffi kaagillu sassaalliutigineqassapput. Takunissat qilanaaraarput.

• Piffissaq: Pingasunngorneq marsip 16-iat, nal. 17.00-19.00
• Sumiiffik: Katuaq (Hans Lyngep Inersuaa)

Pilersaarut

Oqallinnermut tikilluaqqusineq aallarniinerlu

Ambassadøri Michael Zilmer-Johns, Regeringens Sikkerhedspolitiske Analysegruppemi pisortaq

Isummersoqatigiittut

• Sara Olsvig (Ilisimatusarfik)
• Camilla Sørensen (Forsvarsakademiet)
• Peter Viggo Jakobsen (Forsvarsakademiet)
• Jeppe Strandsbjerg (Forsvarsakademiet / Ilisimatusarfik)
• Jørgen Staun (Forsvarsakademiet)

Oqallinnermi aqutsisoq: Rasmus Leander (Nasiffik / Ilisimatusarfik) & Henrik Gram Pedersen (CAS / Forsvarsakademiet)