Atuakkiortut arfinillit Danmarkimi, Kalaallit Nunaanni savalimmiunilu universitetini allannermik suliaqarnissamut legatinnapput

VELUX FONDENip misiliutaasumik suliniutaa Writers-in-residence humaniorap eqqumiitsuliornerullu akornanni isummersoqatigiinnermik siuarsaassaaffiussaaq takorluukkiornermullu nakussassaataassalluni - maanna naalagaaffeqatigiinnerup immikkoortuini pingasuni tamani. Atuakkiortut piginnaaneqarluartut arfinillit universitetini allannermik suliaqarnissamut legatinnapput.

Takorluukkiornermi writers-in-residencertut nutaat tassaapput: Sørine Steenholdt, René Jean Jensen, Peder Frederik Jensen, Alen Meskovic, Maja Lee Langvad aamma Anna Malan Jógvansdóttir. Qanittukkut taakku ukunani sulilissapput: Ilisimatusarfik, Aalborg Universitet, Syddansk Universitet aamma Færøernes Universitet.

VELUX FONDEN tamatuminnga ingerlatsinermigut kissaatigaa takorluukkiornermik nakussassaassalluni atuakkiornermilu ilisimaneqarlualertoqarnissaanut aqqutissiuussissalluni. Atuakkiortunik, ilisimatusartunik ilinniartunillu suleqatigiinnissamut isumassarsioqatigiinnissamullu piffissaqartitsinikkut inissaqartitsinikkullu isumassarsiullaqqissumik nutaanik ilisimasaqalerlunilu saqqummeeriaaseqalersinnaavoq.

"Danmarkimi universitetini arfinilinni atuakkiornermik suliaqarfiit atuakkiortullu piginnaaneqarluartut siorna siullertut writers-in-residence-imik aningaasaliiffigineqartut suleqatigilluareerlugit maanna Kalaallit Nunaanni Savalimmiunilu universiteti atuakkiornermik suliaqarfinnut aamma qaaqquavut. Sumiiffinni taakkunani aningaasaliiffigineqartunit erserpoq atuakkiortut eqqumiitsuliullaqqissuusut allannermillu suliaqarnertik eqqumiitsuliortutut ineriartornissaminnut atorluarsinnaagaat. Tamatuma saniatigut neriuutigaarput taamaalilluta nunat pingasut taakkua akornanni atuakkiornikkut ataqatigiilluarnerulersoqarumaartoq. Nunani pingasuni taakkunani tamani takorluukkiorneq inuiaqatigiinnut inuillu oqartussaaqataanerannik siunnerfeqarnermut pingaaruteqarluinnarpoq", Henrik Tronier VELUX FONDENimi pilersaarusiornermi pisortaasoq taama oqarpoq.

Sørine Steenholdt oqarpoq: "Kulturimik, Oqaatsinik Oqaluttuarisaanermillu Ilisimatusarfimmi Ilisimatusartunik, ilinniartitsisunik minnerunngitsumillu ilinniartunik suleqateqarnissara qilanaareqaara. Piffissamik eqqorluaapput Kalaallit Nunaanni atuakkiornermi soqutiginartumik ineriartortoqarmat atuakkiornerullu siunissaa isumalluarnarsigaluttuinnarmat. Kingullertullu, minnerunngitsumilli, qilanaareqaara manuskriptiliama naammassinissaanut piffissaqarlualernissara".