Atuagassiaq ilisimatuussutsimut nalinginnaanerusumut tunngasoq Ilisimatusaat saqqummersoq nutaaq akeqanngitsoq - ilasseqatigiinnissamut qaaqqusissut

Maanna atuagassiaaterput nuannarineqarluartoq ilisimatuussutsimut nalinginnaanerusumut tunngasoq Ilisimatusaat saqqummersinneqaqqippoq.

Ilisimatusaat 2021-22 Ilisimatusarfimmit Pinngortitaleriffimmillu saqqummersinneqarpoq NAPA-mit Nunani Avannarlerni Piorsarsimassutsikkut Attaveqataasumit tapiiffigineqarlutik.

Ilisimatusaat 2021-22-p saqqummersinneqarnera nalliussiniarlugu novembarip 4-anni nal. 16.00-imiit campus Ilimmarfimmi kantiinami ilasseqatigiinnissamut qaaqqusivugut.

Atuagassiaq ulluinnarni Ilisimatusarfimmi Pinngortitaleriffimmilu ilisimatusarfigisartakkatta ilaat pillugit paasissutissartalik sapinngisamik inunnut amerlanerpaanut anngutitinneqassaaq. Atuagassiami ilisimatusarnermi ineriartortitsinermilu suliniutivut assigiinngitsut pillugit atuaruminartunik allaaserisaqarpoq oqaatsinilu ukunani tamani allataallutik: kalaallisut, danskisut tuluttullu.

Atuagassiaq akeqanngilaq nittartakkatsinnilu uni.gl-imi aamma natur.gl-imi aaneqarsinnaallutik. Tamatuma saniatigut arlalinngorlugu naqitaajumaarpoq, naqitallu Kalaallit Nunaanni ilinniarfinnut agguaanneqassapput.

Ilisimatusaat 2021-22-mi uku pillugit atuarsinnaavutit:

Oqaatsit, atuakkiat tusagassiuutillu (Ilisimatusarfik)

• Nassaaq nutaaq: Kalaallisut atuagaq siulleq (Flemming A. J. Nielsen)
• Kinamiuaqqat pingasut aamma Arctic Noir (Annemette Hejlsted)
• Kakaliit / Kakalêwt - Hans Lyngemit isiginnaagassiaq kulturikkut naapinneq, ajorluinnartumik inerneqartoq, pillugu (Birgit Kleist Pedersen)
• Kalaallisummi oqaatsivut ataqqineqanngillat! (Camilla Kleemann- Andersen)
• Qanorooq kalaallit tv-aviisiat pillugu oqaluttuaq (Aviaq Fleischer)

Inuiaqatigiit inuussutissarsiornerlu (Ilisimatusarfik)

• Nasiffik: Ilisimatusarfimmit nunanut allanut aamma sillimaniarnermut politikkimik qitiutitsineq annertusineqarpoq (Rasmus Leander Nielsen)
• Oqareeriallaataa iliuuseqarneq - inuusuttut najukkami piujuartitsinermik pilersitsiniarnermi peqataaneri (Anne Lise Kappel)
• Kalaallit Nunaanni aqutsinermik aamma suliffeqarfinnik ineriartortitsineq (Mette Apollo Rasmussen)
• Ulluinnarni ingerlatsinermi sullivimmi avatangiisit atuutsinneqalerneri (Peter Hasle, Søren Voxted & Anne Lise Kappel)

Meeqqat inuusuttullu (Ilisimatusarfik)

• "Aliortukkatut misigisimavunga uanga takuneqanngitsuusaatut ippunga" - Kalaallit Nunaanni meeqqanut angerlarsimaffimmi inissinneqarsimaneq pillugu (Bonnie Jensen)
• Pisinnaatitaaffiit oqaloqatigiinnerit aqqutigalugit pilersineqaraangata - meeqqat pisinnaatitaaffii pillugit ilisimatusarnermi suliniut (Aviâja Egede Lynge & Peter Berliner)
• 'Are u dum, stupid or dum ha?!' Nipi qinngarsuisoq generation Z aamma Alpha-meersoq - Kalaallit Nunaanni meeqqat inuusuttullu inuit attaveqaqatigiiffiinik atuineq (Rosannguaq Rossen)
• Kalaallit Nunaani meeqqat atuarfianni tekniki nutaaq - eye tracking atuarnermik ilinniartitsinermi (Ivalu I. Mathiassen)

Pinngortitaleriffik

• Kalaallit Nunaanni imaani ilisimatusarnerni pissutsit nutaat atuukkaluttualeqaat (Henrik Lund)
• Qilalukkap qernertap uumasuunera tupinnartoq (Mads Peter Heide-Jørgensen)