Ilisimatusarfik kalaallisut oqaatsivut pillugit ilinniakkanik ilisimatusarnermillu aallussinerulerpoq

Ilisimatusarfik universitetimi oqaatsinik ilinniakkanik marlunnik - Oqaasilerinermi, Atuakkialerinermi Tusagassiuutilerinermilu bachelorinngorniarfillunilu kandidatinngorniarfimmi aamma Nutserisutut Oqalutsitullu bachelorinngorniarfimmi Kulturimik, Oqaatsinik Oqaluttuarisaanermillu Ilisimatusarfimmiittunik - annertuumik aaqqissuusseqqilerpoq.

Ilinniartitsisunngorniarfimmi ilinniarnertuunngorniarfinnilu kalaallisut ilinniartitsisuusussatut, Oqaasileriffimmi oqaatsinik ilisimasalittut nutserisutullu oqalutsitullu il.il. ilinniagaqartoqarnerunissaa pisariaqartinneqaleraluttuinnarpoq - aamma ilinniakkat imarisaannik taakkunanilu pingaarnersanik allannguisoqartariaqalerpoq inuiaqatigiinni pisariaqartinneqartunut naleqqussarneqarniassammata. Taakkua saniatigut Oqaasilerinermi, Atuakkialerinermi Tusagassiuutilerinermilu kandidatinngortartut oqaatsinik immikkut sammisaqarniarlutik aalajangertartut ukiorpaalunni ikiliartorsimapput. Tamatuma kinguneranik oqaatsinik ilisimatusarnerup ingerlajuartinnissaa tamatumunngalu atatillugu universitetimi kalaallisut oqaatsini atuakkialerinermilu ilinniartitsineq ajornakusuulersimapput.

Taamaattumik oqaatsinik ilinniakkani marlunni taakkunani annertuumik aaqqissuusseqqittoqassaaq kinguneranillu 2024-mi septembarimi ilinniakkanik aallartitsiffimmi atuutilersussanik marlunnik nutaanik ilinniakkanik aaqqissuussaqalissalluni.

Ilinniagaq Oqaasilerinermi, Atuakkialerinermi Tusagassiuutilerinermilu ilinniakkanik aaqqissuussami nutaami Kalaallisut Oqaatsinillu Ilisimatusarneq - Grønlandsk & Sprogvidenskab-imik taaguuteqalersussami GUX-imi ilinniartitsisunngorniarfimmilu ilinniartitsisussanik oqaasilerinermi, atuakkialerinermi saniatigullu fagini kulturimut tunngasuni allani suli ilinniartitsiviusassaaq - kalaallisulli oqaatsinik suli aallussinerussallutik.

Ilinniakkamilli maanna atuuttumik, Oqaasilerinermik, Atuakkialerinermik Tusagassiuutilerinermillu, aaqqissuussinermut tunngatillugu ilinniakkamik aaqqissuussami ukiumi 2023-moortumi ilinnialersussanik akuersinngikkallartoqartariaqassaaq. Taamaattumik aatsaat 2024-mi ilinnialersussanik akuersisaleqqittoqarumaarpoq, ilinnialersullu ilinniakkamik aaqqissuussaq nutaaq malillugu ilinnialerumaarput.

Nutserisutut Oqalutsitullu ilinniakkamut tunngatillugu ilinnialersussanik 2023-mi akuersisoqartassaaq - 2024-miillu ilinnialerlaat ilinniakkamik aaqqissuussaq nutaaq malillugu ilinnialissallutik. Nutserisutut Oqalutsitullu ilinniakkamik ineriartortitsinerup saniatigut bachelorinngortut nangitsiviusumik ilinniarfissaannik ineriartortitsisoqassaaq.

2021-mi Kulturinik, Oqaatsinik Oqaluttuarisaanermillu Ilisimatusarfimmi Oqaatsinik Ilisimatusarfittaaq ammarneqarpoq tamatumunnga atatillugu suliniutigineqartut aqqutigalugit ineriartorterusaarneqarluni. Oqaatsinik Ilisimatusarfittaami aqutsisoq, lektori Naja Blytmann Trondhjem, 2023-mi oqaatsinik ilinniakkanik aaqqissuusseqqinnermik ineriartortitseqataassaaq, ilisimatusarfillu tamanna oqaatsinik ilisimatusarnermi suliniutigineqartut Ilisimatusarfimmi aallaaveqartarnissaannik oqaatsinillu ilinniakkat ilisimatusarnermik tunngaveqartinnissaannik siumut qulakkeereqataasalissaaq.

Taakkuninnga suliniuteqarnikkut Kulturinik, Oqaatsinik Oqaluttuarisaanermillu Ilisimatusarfimmit kalaallisut oqaatsinik ilinniartitsinermut ilisimatusarnermullu piujuartitsiviusumik tunngavissiisoqarnissaa - aamma ilisimatusartunik, ilinniartitsisunik, oqalutsinik nutserisunillu oqaatsinik ullumikkornit suli atuisoqarnerulernissaanut ineriartortitsisoqarnerulernissaanullu naammattunik ilinniartitsisoqarnissaa - neriuutigineqarpoq.