Kalaallit Nunaanni kulturi inuiaqatigiillu pillugit antologii tyskisooq nutaaq

Allattoq Ebbe Volquardsen

Kalaallit Nunaannik Issittumillu aamma ilisimatusarfigineqartunik assigiinngitsunik inuiaqatigiinnilu pisunik nunanit tamalaanit soqutiginnittoqaleraluttuinnarpoq.

Ikinnerpaalli danskisut, oqaatsit Kalaallit Nunaannik kulturikkut inuiaqatigiinnillu ilisimatusarnermi suli saqqummersitsiffiunerpaasartut atorlugit, atuartarput. Tamannarpiaq pillugu antologii Grönland: Kontinuitäten und Brüche im Leben der Menschen in der Arktis sociologip tyskip Frank Sowap suliaa saqqummeqqammersoq atorfissaqarluartinneqassaaq. Atuagaq ima nassuiaaserneqarsinnaavoq: »Issittormiut inooriaasiata atajuarnera atuukkunnaarneralu«. Taanna ilisimatusartunit 16-init ilaatigut Kalaallit Nunaanneersunit, Danmarkimeersunit Tysklandimeersunillu allaqataaffigineqarpoq, taakkualu tamarmik immikkut Kalaallit Nunaanni ukiuni kingulliunerusuni inuiaqatigiinni ineriartorneq pillugu assigiinngitsunik allaaserisaqarput. Sociologii, polititoologii, inuiaqatigiilerineq, oqaluttuarisaaneq, atuakkialerinermik kulturimillu ilisimatusarneq eqqumiitsuliornermilu oqaluttuarisaaneq tunngavigalugit misissueqqissaartoqarpoq.

Sammineqartorpassuit ilagaat namminiilivinneq nammineernerunissarlu anguniarlugu politikkikkut ineriartorneq, atuagaateqarnermi eqqumiitsuliornermilu katersugaatinik misissueqqissaarneq, kulturikkut eqeersaaneq Kalaallillu Nunaanni silap pissusianik teorii. Aammattaaq pinerluttunik isumaginninneq, imminut toqunnissamik pinaveersaartitsineq, Arctic Winter Games, Peqatigiiffik Qajaq Nuuk, kalaallit nerisartagaat, illoqarfiit nunaqarfiillu imminnut atassutaat aatsitassallu pillugit oqallinneq pillugit misissuisoqarpoq.

Atuakkiarinera sivisusimavoq taamaallaat crowd funding aqqutigalugu aningaasaliiffigineqarmat. Taamaattumillu allaaserisani politikkikkut inuiaqatigiinnilu ineriartornerit kingulliit ilanngunneqanngillat. Aammattaaq allaaserisat ilaat siornatigut danskisut tuluttulluunniit saqqummersinneqarsimasuupput taakkunanngalu nutsigaallutik allaqqitaallutilluunniit. Taamaakkaluartoq antologiimi ullutsinni Kalaallit Nunaanni pisut naleqangaartumik paasissutissiissutigineqarput - maannamullu tyskisut atuagassani tamanna amigaatigineqarsimavoq.

Ilisimatusarfimmi ilisimatusartut Maria Ackrén, Annemette Nyborg Lauritsen antologiimik allaqataapput uangalu nammineq allaqataallunga. Allaqataasunut ilaapputtaaq ilisimatusartuusimasut Ilisimatusarfimmullu atassuteqartut Birgit Kleist Pedersen, Wolfgang Kahlig, Jens Heinrich aamma Mark Nutall.