Kalaaleq ph.d.-liortoq Chicagolialerpoq

Camilla Kleemann-Andersenip - adjunktip ph.d-liortup, Oqaasilerinermut, Atuakkialerinermut Tusagassi-uutilerinermullu Immikkoortortami / Oqaatsinik Ilisimatusarfimmeersup - Chicagomi universitetimi ilisimatusarnissani aallartingajalerpaa.

Taqqavani ilisimatusarnermini ph.d-liaminut atatillugu kapitalit marluk Camillap allassinnaassavai:

• Assigiissaarinissamik isummat tunngaviusut inuiaqatigiit inuillu ataasiakkaat inissitsitigaanerannut qanoq sunniuteqarnerat pillugu kapitali, aamma
• Assigiissaarinissamik isummat tunngaviusut sumiorpaluutit aalajangersimasut attanniarneranni qanoq unamminiarnartuusinnaanerat pillugu kapitali.

Camillap ilisimatusarnermini tunngavittut atugai ilaatigut tassaapput University of Chicagomi oqaasilerinermik inuiaqatigiit pissusiinut atasumik ilisimatusarnermi paasisat. Taamaattumik universitetimi tassaniikkallarnissaq Camillamut periarfissatsialaavoq: University of Chicago fakultetinik immikkoortortaqarpoq ataatsimoorfigineqarlunilu sammisat attuumassuteqartut pillugit kandidatinngorniartunik bachelorinillu silassorissorpassuarnik.

Kalaallit Nunaanni Ilisimatusarfiup tikikkuminaakuluttumiinnera aammalu tassani sociolingvistikkimik immikkut ilisimasaqartoqannginnera unamminiarnartunut ilaavoq. University of Chicagomi Camillap tulaavigisussaavaa professor Lenore Grenoble, issittuni oqaatsit pillugit ilisimasartooq ukiorpassuillu ingerlaneranni Kalaallit Nunaat pillugu paasisimasaqalersimasoq. Camillap universitetimi lingvistikkimut antropologiimullu immikkoortortaqarfimmi akademikerit suleqatigiinnernik seminarinillu aaqqissuussisarnerini peqatigissavai, sammisaralugit oqaatsit assigiinngisitaarneri allanngorarnerilu kiisalu semiotik inooqatigiinnermut tunnganerusoq. Aammali Camilla ilisimatusarnikkut suleqataassaaq nunarsuup ilaani allani oqaatsinittaaq sammisaqartut suleqatigalugit.

Camillap University of Chicagomut ilisimatusariarnissaa 2023-mi aggustimi aallartittussatut 2024-milu maajimi naasussatut pilersaarusiugaavoq. Tamanna periarfissaqalersimavoq ilisimatusartunut aningaasaliisarfiup ataqqineqaataalluartartup Fulbright Foreign Student Scholarshipip kiisalu Ivalo & Minik Fondenip aningaasaliinerisigut.

Aningaasaateqarfiit taakku tamarmik unammillerfiusorujussuupput - taamaattumillu qinnuteqartut ilaannaat aningaasaliiffigineqarnissamut anngussinnaasarput.

Camillap taamatut aningaasaliiffigineqarnissamik angusaqarsimanera qinnuteqartutut immikkuullarissuu-neranik takutitsivoq - aammalumi lingvistitut, oqaasilerisutut, piukkunnaateqarluarnera ph.d.-liaatalu pingaaruteqarnera tassuuna takuneqarsinnaapput.