Pitsaassutsikkut qulakkeerinnittarneq pillugu ataatsimeersuarneq

Allattoq Joachim Sloth Larsen

Ilisimatusarfimmi pitsaassutsikkut qulakkeerinnittartoqatigiit, tassaasut Joachim Sloth Larsen aamma professori Gestur Hovgaard, Norgemi isumassarsiorfiusumi ilikkagaqarfiusumilu ataatsimeersuaqataareerlutik uteqqammerput.

Ataatsimeersuartitsinerup siunertaa tassaavoq nunat avannarliit akunnerminni ilisimasanik avitseqatigiittarnerisa nukittorsaavigineqarnissaa, tassanilu ”The Standards and Guidelines for Quality Assurance in the European Higher Education Area” (ESG 2015) naapertorlugu piginnaatitsisarneq aamma pitsaassutsikkut qulakkeerinnittarneq immikkut ukkatarineqarsimapput.

Ataatsimeersuarnermi Martina Vukasovicip “Why QA Processes in Higher Education (Always) Result in Diverse and Unintended Outcomes”-imik qulequtsikkani pingaarnertut saqqummiuppaa. Tassani Vukasovicip ersersippaa nuna tamakkerlugu politikkikkut, suleriaatsikkut kulturikkullu assigiinngissutsit nunani taakkunani pitsaassutsikkut qulakkeerinnittarnerup iluani qanoq nikerartigisunik periuseqartitsisarlutillu inerneqartitsisarnersut. Assigiinngissutsit taakkua nukitsoqqutitut isigineqarneqakkajuttariaqaraluartut Vukasovicip erseqqissaatigaa, taakkuami aaqqiissutinik aamma sammiviliiffinnik assigiinniiaartunik tunniussaqartarmata.

Ataatsimeersuarneq peqataasunik nunanit avannarlerneersunik, Europap Kangisissuaneersunik kiisalu Savalimmiuneersunik nunatsinneersunillu katerisimaartitsivoq. Sinniisut Kalaallit Nunaanneersut peqataasut tassaapput Niuernermik Ilinniarfik, Perorsaanermik Ilinniarfik, Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik - kiisalu soorunami Ilisimatusarfimmit uagut.

Paasisavut Ilisimatusarfimmut angerlaassavut assersuutigalugit tassaapput:

• Ungasinngitsumi naalakkersuisoqarfiup”Retningslinjer for intern kvalitetssikring af undervisning på videregående uddannelser” (ingerlaqqiffiusutut ilinniarfiit iluanni pitsaassutsikkut qulakkeerinnittarnermut najoqqutassat) nutaat saqqummersissavai. Tamassumani pingaarutilittut maluginiagassaq tassaavoq najoqqutassat suliarineqarnerat peqataatitsisumik ingerlanneqarsimammat, tassanilu siammasissumik peqataatitsisoqarnera eqeersimaartumillu peqataasoqarnera misigisimavarput.
• Ilisimatusarfiup iluani pitsaassutsikkut qulakkeerinnittarnermik suliaqarnerput qitiusumik naleqartitanit soorlu ineriartornermik aamma tatiginninnermik tunngaveqassaaq - nakkutilliinermut atortuussanngilaq.
• Immikkut pisariaqartitatsinnut tulluartumik assilisassiamik naleqqussakkamik ineriartortitsissaagut - taamaammallu pitsaassutsikkut qulakkeerinnittarnermi Islandimiut assilisassiaasa aallaaviginissaat isiginiarparput. Taannami nunani avannarlerni nunanut annerusunut soorlu Finlandimut, Norgemut, Sverigemut Danmarkimullu sanilliullugu killiffitsinnut naleqqunneruvoq. Tamanna ilutigalugu assilisassiatta nunatsinni pissutsinut tulluarsarnissaa aamma isumagissavarput.
• Pitsaassutsikkut qulakkeerinnittarnermut aamma ineriartortitsinermut atortutsinnik ineriartortitsinerput ammalluinnartumik periuseqarluta ingerlassavarput. Ilinniartitsisuutitsinnit siunnersuutinik pissarsinissarput pingaaruteqarpoq - aammattaarli pitsaassutsikkut qulakkeerinninnitta pileriartornerani ilinniartut eqeersimaartumik peqataatinneqarnissaat pingaaruteqarpoq.

Naggasiutitut oqaatigissavarput Danmarks Akkrediteringsinstitution pilersinneqalermat. Taakkua pitsaassutsikkut qulakkeerinnittarneq, piginnaatitsineq suliassaqarfiullu iluani nutaarsiassat kingulliit immikkut ingerlassavaat, tamannalu isumaqarpoq ingerlaqqiffittut ilinniarfiit pillugit suliassaqarfiup iluani danskit ministereqarfiata piginnaassuteqartitsinermik suliaqartarneq maannamit suliassaanut ilanngunneqassasoq.